Shirdi Ram Navmi Utsav 113 Years ago: श्रद्धा आणि सबुरीचा संदेश देणाऱ्या साईबाबांच्या प्रेरणेतून ते वास्तव्यास असलेल्या द्वारकामाईत एकशे तेरा वर्षांपूर्वी पहिला श्रीरामनवमी उत्सव साजरा झाला.

एवढेच नाही, तर संतकवी दासगणू यांच्या परंपरेतील नारदीय कीर्तनाची परंपरा या उत्सवाच्या निमित्ताने रूढ झाली. विशेष म्हणजे लोकमान्य टिळकांचे स्नेही दादासाहेब खापर्डे यांच्यासह तत्कालीन साईभक्तांचा हा उत्सव सुरू करण्यात सहभाग होता. साईभक्तांनी येथील श्रीरामनवी उत्सवाची कीर्ती देश-विदेशात पोहोचवली.

साईभक्त बाबांना प्रभू रामचंद्राच्या रूपात पाहतात. त्यांचा उल्लेख साईराम असा करतात. विविध राज्यांतून शेकडो पदयात्री भाविकांसह साईरामाचा गजर करीत येथे येणाऱ्या पालख्या हे बाबांच्या श्रीरामनवमी उत्सवाचे आणखी एक वैशिष्ट आहे. प्रभू रामचंद्राचे आणि साईंचे हे असे अतूट नाते आहे.(Latest Marathi News)

बाबांच्या हयातीत लोकमान्यांचे स्नेही दादासाहेब खापर्डे हे शिर्डीत सहकुटुंब मुक्कामाला होते. श्रीरामनवमी तोंडावर आली होती. कीर्तनकार कृष्णराव भीष्म, साईभक्त काका महाजनी यांनी साईबाबांसमोर श्रीरामनवमी उत्सव साजरा करण्याची कल्पना मांडली. बाबांनी होकार दिला.

७ एप्रिल १९११ रोजी बाबा वास्तव्यास असलेल्या द्वारकामाईत पहिला श्रीरामजन्मोत्सव पार पडला. भीष्मांनी कीर्तन सादर केले. १९१४ सालापासून संतकवी दासगणू महाराजांनी बाबांच्या आज्ञेवरून पहिले नारदीय कीर्तन सादर केले. पुढे हयातभर त्यांनी श्रीरामजन्मावर आधारित नारदीय कीर्तन सादर करण्याची परंपरा सुरू ठेवली. बाबांच्या हयातीत सुरू झालेली ही परंपरा आजही कायम आहे. येथील प्रत्येक उत्सवात नारदीय कीर्तन सादर केले जाते. (Latest Marathi News)

बाबांनी सुरू केलेल्या येथील श्रीरामनवमी उत्सवात सहभागी होण्यासाठी विविध राज्यांतून शेकडो भाविक साईंच्या शिर्डीत साईरामाचा गजर करीत पालख्या घेऊन येथे येतात. एका अर्थाने हा पालख्यांचा उत्सव झाला आहे. बाबांनी सुरू केलेला हा उत्सव आता साईभक्तांच्या वतीने शंभराहून अधिक देशांत साजरा होतो.