पारनेर ः पारनेर कृषी उत्पन्न बाजार समितीतील आठ हमालांना, तसेच काही दिवाणजींना कोरोनाची लागण झाली. त्यामुळे 30 एप्रिलपर्यंत कांदा लिलाव बंद ठेवण्याचा निर्णय बाजार समितीतर्फे घेण्यात आला आहे.

सध्या बाजार समितीत मोठ्या प्रमाणात शेतकरी कांदा घेऊन येत आहेत. त्यातच बाजार समितीतील आठ हमाल व काही दिवाणजींना करोनाची लागण झाली आहे. सुरक्षा उपाययोजना केल्या, तरीही कोरोनाचा प्रसार होण्याची शक्‍यता नाकारता येत नाही. त्यामुळे शेतकरी व व्यापाऱ्यांच्या सुरक्षिततेसाठी व कोरोनाचा प्रसार टाळण्यासाठी बाजार समिती 30 एप्रिल पर्यंत लिलाव बंद ठेवण्याचा निर्णय घेतला आहे. या निर्णयामुळे शेतकऱ्यांची गैरसोय होणार आहे. सध्या अवकाळी पाऊस होत असल्याने व साठवण्याची सोय नसल्याने शेतकरी कांदा विक्रीसाठी घेऊन येत आहेत.

हमालांना एकत्रीत काम करावे लागते. तसेच लिलाव करतानाही शेतकरी, व्यापारी, दिवाणजी यांचा सततचा संबंध येतो. त्यामुळे कोरोनाचा प्रसार वाढू नये, यासाठी लिलाव बंद करण्याशिवाय पर्याय नसल्याने, हा निर्णय घेण्यात आला आहे. आजपासून 30 एप्रिलपर्यंत लिलाव बंद ठेवण्यात येतील, असे बाजार समितीतर्फे सांगण्यात आले.

सोळा हजार गोण्यांची आवक

आज बाजार समितीत 15 हजार 945 कांदा गोण्यांची आवक झाली. प्रथम क्रमांकाच्या कांद्याला एक हजार ते एक हजार दोनशे रुपये, दुसऱ्या क्रमांकाच्या कांद्यास सातशे ते नऊशे रुपये व गोल्टीला दोनशे ते सहाशे रुपये दर मिळाला.

बातमीदार - मार्तंड बुचुडे