अहमदनगर - विवाहितेचा शारीरिक व मानसिक छळ करून तिला आत्महत्येस प्रवृत्त केल्याबद्दल पती व सासरा या दोघांना नगर तालुका पोलिसांनी अटक केली आहे. त्यांना न्यायालयात हजर केले असता, एक दिवसाची पोलिस कोठडी देण्यात आली आहे.

अरणगाव (ता. नगर) येथील रहिवासी वनिता सागर चव्हाण (वय २५) हिने सासरच्या शारीरिक व मानसिक छळाला कंटाळून राहत्या घरी बुधवारी (ता. ८) सकाळी गळफास घेऊन आत्महत्या केली. तिचा पती सागर (वय ३०) आणि सासरा मेनशर रामभाऊ चव्हाण (वय ५०) या दोघांनी तिला उपचारासाठी अहमदनगर येथील शासकीय रुग्णालयात आणले होते. तिचे नातेवाईक सोमनाथ सोनगीर काळे (वय ५५, रा. सोनेसांगवी, ता. शिरूर) यांनी दिलेल्या फिर्यादीवरून नगर तालुका पोलिस ठाण्यात वनिताचा पती सागर आणि सासरा मेनशर यांच्याविरुद्ध आत्महत्येस प्रवृत्त केल्याचा गुन्हा दाखल करण्यात आला आहे.

पोलिस उपनिरीक्षक रणजित मारक आणि सरकारी वकील अनिकेत आव्हाड यांनी या गुन्ह्याच्या सखोल तपासासाठी दोन्ही आरोपींच्या सात दिवस पोलिस कोठडीची मागणी केली. न्यायालयाने एक दिवसाची पोलिस कोठडी सुनावली आहे.