मागील आठवड्यापासून केंद्रीय रेल्वे राज्यमंत्री रावसाहेब दानवे यांच्या वडापाव आणि चहाची पोस्ट चांगलीच गाजली. रेल्वेमंत्री अश्विनी वैष्णव यांच्यासोबत रेल्वेतून प्रवासादरम्यान दानवे यांनी वडापाव खाल्ल्याचं ट्वीट केलं. पण या ट्विटची चर्चा दानवेंनी पैसे न दिल्याने झाली. काहींनी त्यांच्यावर वडापाव खाऊन पैसे न दिल्याचा आरोप केला.

त्यानंतर सोशल मीडियावर रावसाहेब पुन्हा चर्चेत आले. अनेकांनी मिश्किल टिप्पण्या करत दानवेंना टोला लगावला. आता राष्ट्रवादीचे आमदार रोहित पवार यांनीही दानवेंना टोला लगावल्याचं दिसतंय. रोहित पवारांनी एकाच दगडात दोन पक्षी मारले. त्यांनी दानवेंसोबत फडणवीसांनाही टोला लगावला.

रोहित पवार यांनी नगरच्या जामखेडमध्ये असताना कार्यकर्त्यांसोबत मिसळ खाण्याचा आस्वाद घेतला. यावेळी काही फोटो काढून त्यांनी ट्विटरवर प्रसिद्ध केले आणि पुन्हा चर्चांना उधाण आलं.

काय म्हणाले रोहित पवार?

'मतदारसंघात असताना भूक लागल्याने माही जळगावमधील राहुल हॉटेलमध्ये कार्यकर्त्यांसोबत मिसळ खाल्ली... एकाच मिसळमध्ये पोट भरल्याने '३५' मिसळ खाण्याच्या केवळ कल्पनेनेच कसंतरी झालं.. आणि हो... मिसळ खाल्ल्यानंतर पैसे न देताच उठून गेलो नाही तर नेहमीप्रमाणे बिलही पेड केलं.

हे ट्वीट केल्यानंतर फडणवीसांच्या ३५ पुरणपोळ्या आणि दानवे यांनी वडापाव खाऊन न दिलेले पैसे, असे दोव्ही मुद्दे अधोरेखित झाले. त्यामुळे नेटकऱ्यांमध्ये आवडीने हा विषय चघळला जातोय.