रोहित पवारांकडून मिसळची तुलना पुरणपोळीशी; फडणवीसांना लगावला टोला

नगर : मतदारसंघात कार्यकर्त्यांनासोबत फिरत असताना आमदार रोहित पवार (Rohit Pawar) यांनी एका हॉटेलात मिसळवर (Misal Pav) चांगलाच ताव मारला. पण या मिसळची तुलना त्यांनी थेट पुरणपोळ्यांशी (Puran Poli) करत थेट भाजप नेते देवेंद्र फडणवीस (Devendra Fadnvis) यांच्यावर निशाणा साधला. अमृता फडणवीस (Amruta Fadnvis) यांच्या एका पोस्टमुळं देवेंद्र फडणवीस आणि पुरणपोळ्या हा विषय चर्चेत आला होता. (MLA Rohit Pawar compares Misal with Puran poli slammed on Devendra Fadnavis)

या मिसळ पार्टीवर रोहित पवार यांनी सोशल मीडियावर पोस्ट शेअर केली आहे. यामध्ये त्यांनी म्हटलं की, "मतदारसंघात असताना भूक लागल्यानं माही जळगावमधील राहुल हॉटेलमध्ये कार्यकर्त्यांसोबत मिसळ खाल्ली. एकाच मिसळमध्ये पोट भरल्यानं '३५' मिसळ खाण्याच्या केवळ कल्पनेनंच कसंतरी झालं. आणि हो...मिसळ खाल्ल्यानंतर पैसे न देताच उठून गेलो नाही तर नेहमीप्रमाणे बिलही पेड केलं"

अमृता फडणवीसांनी सांगितला होता किस्सा

झी मराठीवर ‘किचन कल्लाकार’ हा कार्यक्रम सध्या चर्चेत आहे. या कार्यक्रमात नुकत्याच झालेल्या एपिसोडमध्ये विरोधीपक्ष नेते देवेंद्र फडणवीस यांच्या पत्नी अमृता फडणवीस यांनी हजेरी लावली होती. यावेळी त्यांनी देवेंद्र फडणवीस यांच्या आवडीच्या पदार्थांबाबात अनेक गोष्टींचा खुलासा केला होता.

जेवायला बसल्यानंतर एकाच वेळी देवेंद्र फडणवीस किती पुरणपोळ्या खाऊ शकतात? असा प्रश्न शोचा सूत्रसंचालक संकर्षण कऱ्हाडेनें अमृतांना विचारला विचारला. यावर अमृता यांनी ते 30 ते 35 पुरणपोळ्या सहज पातेलंभर तूपासोबत खायचं असं म्हटलं होतं. तर ३०-३५ पुरणपोळ्या ते कसे खातात हे पाहायची इच्छा असल्याचेही त्या म्हणाल्या होत्या.