श्रीगोंदे : महाराष्ट्र रस्ते सुधारणा प्रकल्पांतर्गत तालुक्यातील ५३१ कोटी ९३ लाखांच्या तीन रस्त्यांचे मुख्यमंत्री एकनाथ शिंदे यांच्या हस्ते शुक्रवारी (ता.११) शहरातील जोधपूर मारुती चौकात आभासी प्रणालीद्वारे भूमिपूजन होणार असल्याची माहिती भाजप युवा मोर्चाचे प्रदेश उपाध्यक्ष विक्रमसिंह पाचपुते यांनी दिली.

यावेळी उपमुख्यमंत्री देवेंद्र फडणवीस, उपमुख्यमंत्री अजित पवार, महसूलमंत्री राधाकृष्ण विखे, खासदार नीलेश लंके यांची उपस्थिती राहणार आहे. अध्यक्षस्थानी सार्वजनिक बांधकाम मंत्री रवींद्र चव्हाण असतील. आशियाई विकास बॅंक सहाय्यित प्रकल्प ‘महाराष्ट्र रस्ते सुधारणा प्रकल्पांतर्गत’ तालुक्यातील पेडगाव, श्रीगोंदे रस्ता प्रजिमा-६२, काष्टी, श्रीगोंदे, देऊळगाव, मांडवगण रस्ता प्रजिमा-६३ या ३६४ कोटी १८ लाख रुपयांच्या, तर कोळगाव, सुरोडी, वडाळी मार्गे श्रीगोंदा पेडगाव रस्ता प्रजिमा-६२ या १६७ कोटी ७५ लाख रुपयांच्या रस्त्याच्या कामासाठी निधी मंजूर झाला असून, या रस्त्याचे भूमिपूजन शिंदे यांच्या हस्ते आभासी प्रणालीद्वारे होणार आहे.

या कार्यक्रमासाठी उपस्थित राहावे, असे आवाहन आमदार बबनराव पाचपुते यांच्या वतीने भाजप युवा मोर्चाचे प्रदेश उपाध्यक्ष विक्रमसिंह पाचपुते यांनी केले. यावेळी भाजपचे तालुकाध्यक्ष संदीप नागवडे, उपअभियंता विजय होके, माजी सरपंच दत्तात्रय डांगे, सचिन चौधरी आदी उपस्थित होते.