अकोला : आरटीई प्रवेश प्रक्रियेअंतर्गत जिल्ह्यातील गरीब घटकातील विद्यार्थ्यांना खासगी शाळांमध्ये मोफत प्रवेश देण्यात येतो. त्यानुसार शैक्षणिक वर्ष २०२२-२३ या वर्षासाठी जिल्ह्यातील १९६ शाळांनी आरटीईसाठी नोंदणी केली आहे. संबंधित शाळांमधील एक हजार ९९५ जागा आरटीई कोट्यासाठी आरक्षित ठेवण्यात आल्या आहेत. त्यासोबतच पालकांना प्रवेशासाठी ऑनलाईन अर्ज करण्याची प्रक्रिया सुरू झाली असून पालक २८ फेब्रुवारीपर्यंत अर्ज आरटीईच्या अधिकृत संकेतस्थळावर अर्ज करू शकतील.

बालकांच्या मोफत व सक्तीच्या शिक्षणाचा अधिकार अधिनियम (आरटीई) २०१९ मधील कलम १२ (१) (सी) नुसार खासगी विनाअनुदानित शाळांमध्ये प्रएवेश स्तरावर २५ टक्के जागा वंचित व दुर्बल घटकातील मुला, मुलींसाठी राखीव ठेवण्याची तरतूद आहे. त्याअंतर्गत समाजातील आर्थिक व सामाजिक दुर्बल घटकांसाठी खासगी शाळांमध्ये २५ टक्के जागा राखीव ठेवण्यात येतात. गरीब व आर्थिकदृष्ट्या दुर्बल असलेले पालक जास्त प्रवेश शुल्क असलेल्या शाळांमधून आपल्या मुलांना शिकवू शकत नव्हते; मात्र आरटीईमुळे अशा पालकांचे त्यांच्या मुलांना खासगी शाळांमधून शिकवण्याचे स्वप्न साकार होत आहे. दरम्यान यंदा आरटीई कोट्यातून प्रवेश मिळावा, यासाठी अर्ज भरण्याची प्रक्रिया सुरू झाली आहे. त्यामुळे पालक २८ फेब्रुवारीपर्यंत अर्ज भरू शकतात.

अशी आहे जिल्ह्याची स्थिती

• नोंदणी केलेल्या शाळा - १९६

• आरक्षित जागा - एक हजार ९९५

• आतापर्यंत केलेले अर्ज - ११११

शाळांची संख्या घटली

आरटीई प्रवेशाची प्रक्रिया सुरू करण्यापूर्वी प्रत्येक वर्षी शिक्षण विभागामार्फत शाळांना संकेतस्थळावर नोंदणीसाठी वेळ देण्यात येतो. त्यानुसार २०२२-२३ वर्षासाठी जिल्ह्यातील १९६ शाळांनी आरटीई प्रवेशासाठी नोंदणी केली आहे. परंतु गत २०२१-२२ मध्ये जिल्ह्यातील २०२ शाळांनी प्रवेशासाठी नोंदणी केली होती. म्हणजेच यावर्षी सहा शाळांची नोंदणी घटल्याचे लक्षात येत आहे. त्यामुळे आरक्षित जागांची संख्या सुद्धा प्रभावित झाली आहे.