अकोला : ग्रामपंचायतींकडे ब्लिचींग पावडर उपलब्ध नसणे व इतर कारणांमुळे जिल्ह्यातील २४ गावे दूषित पाण्याच्या विळख्यात सापडली आहेत. संबंधित गावातील पाणी नमूने दूषित आढळल्याने नागरिकांच्या आराेग्याचा ग्रामीण भागात खेळखंडाेबा सुरू असल्याचे दिसून येत आहे. यासंबंधीच्या पाणी नमून्यांची तपासणी सप्टेंबर महिन्यात आरोग्य विभागाने केली आहे.

जिल्ह्यातील ग्रामीण भागात राहणाऱ्या नागरिकांना शुद्ध पाणीपुरवठा करता यावा, यासाठी ब्लिचींग पावडरची खरेदी ग्रामपंचायत स्तरावर होणे अपेक्षित आहे. परंतु जिल्ह्यातील काही ग्रामपंचायती ब्लिचींग पावडर खरेदीत टाळाटाळ करता. त्यामुळे नागरिकांना करण्यात येणारा पाणीपुरवठा ब्लिचिंग पावडर विनाच करण्यात येताे.

परिणामी ग्रामीण भागातील नागरिकांना नेहमीच आराेग्याशी संबंधित समस्यांना ताेंड द्यावे लागते. दरम्यान सप्टेंबर महिन्यात जिल्ह्यातील २४ गावांमध्ये ब्लिचींग पावडर नसल्याने व इतर कारणांमुळे अशुद्ध पाणी पुरवठा करण्यात येत आल्याची बाब जिल्हा परिषदेच्या आराेग्य विभागाच्या वतीने करण्यात आलेल्या पाणी नमूने तपासणी अहवालातून समाेर आली आहे. त्यामुळे संबंधित गावांमध्ये साथराेगाचा खतरा वाढला आहे. त्यामुळे याकडे वरिष्ठांनी लक्ष देणे गरजेचे झाले आहे.

आजार बळकावण्याचा धाेका

दूषित पाणी पिल्यामुळे कॉलरासह इतर साथराेग हाेण्याची शक्यता असते. ग्रामीण भागात शुद्ध पाण्याबद्दल नागरिकांमध्ये जागरूकता नसल्यामुळे ते स्वच्छ दिसणारे पाणी सुद्धा शुद्ध पाणी समजून पितात, परंतु ते आराेग्यास अपायकारक असते. दरम्यान अशुद्ध पाणी पुरवठ्यामुळे ग्रामीण भागात साथराेगाची भीती वाढली आहे.

सर्वाधिक गावे अकोला तालुक्यातील

ब्लिचींग पावडर नसल्याने अकोला तालुक्यातील सर्वाधिक २० गावांना दूषित पाणी पुरवठा करण्यात आला. त्यामध्ये अलियाबाद, चाचोंडी, शिवर, शिवणी, मलकापूर, पातूर नंदापूर, कुरणखेड, पैलपाडा, खडकी, शिवापूर, हिंगणा जुना, हिंगणा रोड, अकोली खु., सोमठाणा, दहिहंडा, गणोरी, हिंगणी, खानापूर, रोहना, वडद, ब्रह्मपुरी, कंचनपूर, बादलापूर, दुधाळा, मंडाळा इत्यादी गावांचा समावेश आहे. त्यापैकी सहा गावे अकोला महापालिका हद्दीतील आहेत. याव्यतिरित्त मूर्तिजापूर तालुक्यातील हिरपूर, सांजापूर, धामोरी, लोणसाणा या गावांमध्ये सुद्धा ब्लिचिंग पावडर विरहित पाणी पुरवठा करण्यात आला.