बुलडाणा : बेहिशोबी मालमत्ता जमविल्याप्रकरणी जिल्ह्यात पहिल्यांदाच मेहकर नगराध्यक्षांची चौकशी करण्यात आली. यामुळे जिल्ह्यात इतर राजकीय पदाधिकाऱ्यांसह लोकप्रतिनिधींमध्ये खळबळ उडाली आहे. मेहकर नगरपालिका नगराध्यक्ष पदावर लोकसेवक म्हणून कार्यरत असताना कासम पीरु गवळी यांनी बेहिशोबी मालमत्ता जमविल्याप्रकरणी बुलडाणा लाचलुचपत विभागाने चौकशीअंती कासम गवळी व त्यांच्या पत्नी हसीना बी कासम गवळी यांच्यावर गुन्हा दाखल केला.

याबाबत मिळालेल्या माहितीनुसार, बुलडाणा लाचलुचपत विभागाने २१ डिसेंबर २००६ ते २२ सप्टेंबर २०२० असे १४ वर्षांचे परीक्षण करत मालमत्तेबाबत येणाऱ्या उत्पन्नाचा स्रोत तपासून चौकशी केली. यात लोकसेवक कासम पीरु गवळी नगराध्यक्ष मेहकर पदावर असून, परीक्षण कालावधीदरम्यान, नगरपालिका मेहकर येथे लोकसेवक पदावर कार्यरत असताना, त्यांच्या माहिती व कायदेशीर उत्पन्नापेक्षा विसंगत अशी नमूद रक्कमेची अपसंपदा स्वत:च्या तसेच पत्नीच्या नावे बाळगली. चौकशीदरम्यान ते समाधानकारक खुलासा सादर करू शकले नाही.

रक्कम कोट्यवधीत

लोकसेवक कासम गवळी नगराध्यक्ष म्हणून कार्यरत असताना, त्यांची अपसंपदा रक्कम ५ कोटी ९ लाख ८८ हजार ४९५ रुपये एवढी लाचलुचपत विभागाने दाखविली. याप्रकरणी पोलिस उपअधीक्षक संजय चौधरी यांनी तक्रार दिली असून, पुढील तपास लाचलुचपत विभाग बुलडाणा यांच्या वतीने करण्यात येणार आहे.