नवी दिल्ली - भारतीय दूरसंचार कंपनी संघटनेने (सीओएआय) नुकताच देशभरातील दूरसंचार क्षेत्रातील कंपन्यांच्या ग्राहकांच्या संख्येचा अहवाल सादर केला आहे. ही आकडेवारी ऑक्‍टोबर २०१७ महिन्यातील असल्याचे ‘सीओएआय’ने जाहीर केले आहे. ‘सीओएआय’ने दिलेल्या माहितीनुसार, भारतातील खासगी दूरसंचार सेवा पुरवठादार कंपन्यांची एकूण ९५.३८ कोटी वापरकर्ते आहेत. 

भारती एअरटेलने पहिले स्थान कायम राखत सुमारे २९.९० टक्के हिस्सेदारी काबीज केली आहे. ऑक्‍टोबर महिन्यादरम्यान कंपनीची सेवा घेणाऱ्या ग्राहकांच्या संख्येत ३१ लाखांची भर पडली आहे. त्यामुळे आता कंपनीच्या एकूण ग्राहक संख्येत वाढ झाली असून संख्या २८.५२ कोटींवर पोचली आहे. एअरटेल पाठोपाठ व्होडाफोन इंडिया लिमिटेडने बाजी मारली आहे. ऑक्‍टोबर अखेरपर्यंत कंपनीचे ग्राहक २०.८३ कोटी इतके झाले आहेत, तर आयडिया सेल्युलर लिमिटेडचे ग्राहक १९.०८ कोटींवर पोचले आहेत. 

या अहवालात वैयक्तिक सर्कलसाठी मोबाइल ग्राहकांची आकडेवारीही देण्यात आली आहे, यातील उत्तर प्रदेश (पूर्व) विभाग सर्वोच्च राहिले असून, यातील एकूण ग्राहक ८.३६ कोटी इतके आहे, यात महाराष्ट्र राज्य दुसऱ्या क्रमांकावर असून, याची एकूण मोबाइल ग्राहकांची संख्या ७.९४ कोटी इतकी  आहे.