नवी दिल्ली: मोदी सरकारच्या दुसऱ्या टर्मचा पहिला अर्थसंकल्प 5 जुलैला सादर होणार आहे. नव्या अर्थमंत्री निर्मला सीतारामन 5 जुलैला लोकसभेमध्ये 2019-20 या आर्थिक वर्षासाठीचा अर्थसंकल्प सादर करणार आहेत. मोदी सरकार या अर्थसंकल्पात आपल्या पोतडीतून काय काढते याकडे सर्वांचेच लक्ष लागले आहे. लोकसभा निवडणूकांच्या पार्श्वभूमीवर तत्कालीन अर्थमंत्री पियुष गोयल यांनी चालू आर्थिक वर्षासाठी अंतरिम अर्थसंकल्प सादर केला होता. नरेंद्र मोदी यांच्या अध्यक्षतेखालील मंत्रिमंडळाने 17 जून 2019 पासून लोकसभेच्या अधिवेशनाला परवानगी दिली आहे. 26 जुलै 2019ला हे अधिवेशन संपणार आहे. तर 20 जून 2019ला राज्यसभेच्या कामकाजाची सुरूवात होईल आणि 26 जुलै 2019ला राज्यसभेतील अधिवेशन संपणार आहे. केंद्रीय अर्थसंकल्प 5 जुलै 2019 ला सकाळी 11 वाजता लोकसभेत सादर होणार आहे.

अर्थसंकल्प सादर झाल्यानंतर त्या दिवसासाठी संसदेचे कामकाज तहकूब करण्यात येणार आहे. 19 जून 2019ला लोकसभेच्या नव्या सभापतीची निवड करण्यात येणार आहे. त्यानंतर 20 जून 2019ला संसदेच्या सेंट्रल हॉलमध्ये राष्ट्रपती लोकसभा आणि राज्यसभा या दोन्ही सभागृहांच्या प्रतिनिधींसमोर भाषण करतील.