नवी दिल्ली - कोरोनामुळे देशभरात लॉकडाउननंतर बेरोजगारी दरात मोठी वाढ होत तो 23 टक्‍क्‍यांवर पोचला आहे. शहरी भागातील बेरोजगारी दर सुमारे 31 टक्‍क्‍यांवर पोचला आहे. लॉकडाउनचा विपरित परिणाम होत रोजगारात घट झाली आहे, अशी माहिती "सेंटर फॉर मॉनिटरिंग इंडियन इकॉनॉमी'ने (सीएमआयई) दिली आहे. मार्चच्या सुरवातीपासून बेरोजगारीत वाढ होण्यास सुरवात झाली आहे. त्यानंतर लॉकडाउनमुळे त्यात मोठी वाढ झाली आहे. 

बातम्या ऐकण्यासाठी डाऊनलोड करा ई-सकाळचे ऍप

सर्वसाधारण बेरोजगारी दरात 23.4 टक्‍क्‍यांची वाढ झाली असली तरी शहरी भागातील बेरोजगारीमध्ये अधिक वाढ झाली आहे. शहरी भागातील बेरोजगारीचा दर 30.9 टक्‍क्‍यांवर पोचला आहे. मार्चच्या मध्यापर्यंत दर कमी होता; मात्र मार्चअखेर बेरोजगारीत मोठी वाढ झाली आहे, असे "सीएमआयई'ने म्हटले आहे. 

मार्च महिन्यातील बेरोजगारी दर हा गेल्या 43 महिन्यांमधील सर्वाधिक बेरोजगारी दर आहे. वर्ष 2016 मध्ये नोटाबंदीनंतर बेरोजगारी दरात मोठी वाढ झाली होती. फेब्रुवारीमध्ये तो 7.78 टक्के होता. कोरोना विषाणूचा फैलाव रोखण्यासाठी सध्या देशात 21 दिवसांचा लॉकडाऊन सुरू आहे; मात्र कोरोनाच्या वाढत्या संसर्गामुळे आणखी वाढण्याची शक्‍यता व्यक्त करण्यात येत आहे.