नवी दिल्ली - पंतप्रधान नरेंद्र मोदी यांच्या नेतृत्वाखालील सरकारने 'डिजीटल आणि कॅशलेस' व्यवहारांना बळ मिळावे म्हणून आणखी एक महत्त्वाची घोषणा केली आहे. 

सरकारने डिजिटल पेमेंटला चालना देण्यासाठी लकी ग्राहक योजना सुरू केली आहे. लकी ग्राहक योजनेनुसार डिजिटल व्यवहारावर भाग्यवान ग्राहकाला दिवसाला एक हजार रुपयांचे बक्षिस मिळणार आहे, अशी घोषणा निती आयोगाचे मुख्य कार्यकारी अधिकारी अमिताभ कांत यांनी केली.

लकी ग्राहक योजना 25 डिसेंबरपासून पुढील 100 दिवस म्हणजेच 14 एप्रिलपर्यंत राबवली जाणार असून या योजनेअंतर्गत 15 हजार भाग्यवंतांना दरदिवशी एक हजारांचे बक्षिस मिळणार आहे. याप्रमाणेच डिजी धन व्यापारी योजनेंतर्गत भाग्यवान व्यापाऱ्याला डिजिटल पेमेंटवर आठवड्याला पन्नास हजारांचे बक्षिस देण्यात येणार आहे.