मुंबई: जागतिक आणि देशांतर्गत पातळीवर घडत असलेल्या विविध नकारात्मक आर्थिक घडामोडींचा परिणाम भारतीय शेअर बाजारावर झाला आहे. शेअर बाजार आज (गुरुवार) घसरणीसह बंद झाला. मुंबई शेअर बाजाराचा निर्देशांक सेन्सेक्स 470 अंशांच्या घसरणीसह 36 हजार 093 अंशांवर व्यवहार करत बंद झाला. तर राष्ट्रीय शेअर बाजाराचा निर्देशांक निफ्टी 135.85 अंशाच्या घसरणीसह बंद झाला. निफ्टी अखेर 10 हजार 704 अंशांवर स्थिरावला. 

सकाळच्या सत्रात मुंबई शेअर बाजार निर्देशांक सेन्सेस तब्बल 600 अंशांनी घसरून 36 हजारांच्या खाली घसरला होता. मात्र, दिवस अखेर त्यात सुधारणा   होऊन दिवसभराच्या नीचांकी पातळीपासून सेन्सेक्स आणि निफ्टी सावरले. दिवसभराच्या कामकाजानंतर बीएसईवरील स्मॉल, मिड आणि लार्जकॅपसहित एनएसई वरील सर्वच निर्देशांक नकारात्मक व्यवहार करत बंद झाले. 

शेअर बाजारात झालेल्या पडझडीची प्रमुख कारणे:

भारतीय फास्ट-मूव्हिंग कन्झ्युमर गुड्स (एफएमसीजी) क्षेत्र मागील 15 वर्षातील सर्वात मोठ्या मंदीतून जात असल्याने महसुलात घट होऊ शकते. पैशांच्या  तरलतेचा अभाव आणि शेतकऱ्यांच्या उत्पन्नात झालेली घट यामुळे ग्राहकांच्या खर्च करण्याच्या क्षमतेवर परिणाम होण्याची शक्यता आहे. परिणामी सरकारच्या उत्पन्नात (जीएसटी) देखील घट होण्याची शक्यता आहे. एकूणच सध्याच्या निराशाजनक घडामोडींमुळे शेअर बाजारात 'सेलिंग'चा दबाव दिसून येत आहे. 

त्याचबरोबर, अमेरिकी फेडरल रिझर्व्हने व्याजदरात 25 बेसीस पॉइंट्सने कपात केली आहे. मात्र भविष्यात दर कपात होण्याची कोणतीही शक्यता नसल्याचे स्पष्ट केल्याने आणि बँक ऑफ जपानने देखील जागतिक मंदीची स्थिती आणखी वाढण्याची शक्यता वर्तविल्याने अमेरिका आणि आशियाई शेअर बाजार घसरणीसह बंद झाले. 

परकी गुंतवणूक: गेल्या तीन दिवसात परकी गुंतवणूकदारांनी 1,850 कोटी रुपये बाजारातून काढून घेतले आहेत.    

रुपया घसरला: डॉलरच्या तुलनेत रुपया दिवसभराच्या उच्चाकीनंतर 23 पैशांनी घसरून 71.31 वर बंद झाला.

शेअर्स घसरले : येस बँक (16 टक्के), टाटा स्टील, इंडसइंड बँक, आयसीआयसीआय बँक, मारुती

शेअर्स वधारले : टाटा मोटर्स, एचडीएफसी बँक, भारती एअरटेल, एशियन पेंट्स