Share Market Latest Updates: काल सलग तिसऱ्या दिवशी बुधवारी बाजार घसरणीसह अर्थात लाल चिन्हात बंद झाला. आयटी, मेटल आणि रियल्टी शेअर्समध्ये विक्रीमुळे बाजारावर परिणाम झाला. आज मात्र शेअर बाजाराची सुरुवात सकारात्मक झाली. सेन्सेक्स आणि निफ्टी दोन्ही निर्देशांक आज किरकोळ वाढीसह सुरु झाले. सेन्सेक्स 201.58 अंकांनी वधारून 53,950.84 वर सुरु झाला, तर निफ्टी 79.2 अंकांनी वधारून 16,105.00वर सुरु झाला. निफ्टी 50 मधील हिंदाल्को, आयसीआयसीआय बँक, एचडीएफसी, नेस्टले इंडिया, टाटा स्टीलसह 32 शेअर्स वाढीसह सुरु झाले, तर कोल इंडिया, इंडसलँड बँक, इन्फोसिस लिमिटेड, टिसीएस, अॅक्सिस बँकसह 18 शेअर्समध्ये घसरण नोंदवली गेली.

सलग तिसऱ्या दिवशी बुधवारी शेअर बाजार घसरणीसह अर्थात लाल चिन्हात बंद झाला. आयटी, मेटल आणि रियल्टी शेअर्समध्ये विक्रीमुळे बाजारावर परिणाम झाला. व्यवहाराच्या शेवटी सेन्सेक्स 303.35 अंकांनी म्हणजेच 0.56 टक्क्यांनी घसरून 53,749.26 वर बंद झाला. दुसरीकडे, निफ्टी 16,025.80 च्या पातळीवर 99.35 अंक म्हणजेच 0.62 टक्क्यांनी घसरला आहे.

युएस फेडने आर्थिक धोरणे कडक केल्यामुळे अमेरिकेत मंदीचे सावट निर्माण होऊ शकते, असा अंदाज जिओजित फायनान्शियल सर्व्हिसेसचे विनोद नायर यांनी वर्तवला. सध्या जागतिक बाजारपेठेची नजर यूएस फेडवर आहे, ज्याचा उपयोग यूएसमध्ये आणखी व्याजदर वाढीचा अंदाज बांधण्यासाठी केला जाऊ शकतो.