शांघाय: चीनची अर्थव्यवस्था मोठ्या प्रमाणात मंदावली आहे. चीनच्या अर्थव्यवस्थेने मागील तीन दशकांतील सर्वात नीचांकी  विकासदर नोंदवला आहे. चीनच्या देशांतर्गत बाजारपेठेतील घटती मागणी, अमेरिकेबरोबरच्या व्यापारयुद्धाची झळ यामुळे चीनची अर्थव्यवस्था संकटात सापडली आहे. जुलै ते सप्टेंबर या कालावधीत चीनचा विकासदर 6.0 टक्क्यांवर आला आहे. याआधीच्या तिमाहीत हाच विकासदर 6.2 टक्क्यांवर होता. 1992 नंतरचा हा सर्वात निचांकी विकासदर आहे. 

चालू आर्थिक वर्षासाठी चीनच्या सरकारने विकासदराचे उद्दिष्ट 6.0 ते 6.5 टक्क्यांदरम्यान ठेवले आहे. 2018 मध्ये चीनची अर्थव्यवस्था 6.6 टक्क्यांनी विस्तारली होती. मंदीतून सावरण्यासाठी चीनी सरकारने महत्त्वाच्या करांमध्ये कपात केली आहे. त्याचबरोबर चीनच्या शेअर बाजारातील परकी गुंतवणूकीवरील बंधने निकाली काढली आहेत. चीनच्या केंद्रीय बॅंकेने अर्थव्यवस्थेला चालना देण्यासाठी 28 अब्ज डॉलर वित्तसंस्थांमध्ये ओतल्याची माहिती दिली आहे.