नवी दिल्ली : पंजाब विधानसभा निवडणुकीत मोठ्या विजयानंतर, आम आदमी पार्टीने पक्षाचा मोर्चा शेजारील राज्य हिमाचल प्रदेशकडे वळवले असून, या वर्षाच्या अखेरीस हिमाचल प्रदेशातील (Himachal Pradesh) विधानसभेच्या सर्व जागा लढवणार असल्याची घोषणा शनिवारी करण्यात आली आहे. काँग्रेस आणि भाजप (Congress & BJP) या दोघांनाही कंटाळलेल्या सामान्य माणसासाठी एक पर्याय बनण्याची इच्छा असल्याचे पक्षाने म्हटले आहे. (AAP Announce To Contest In Himachal Pradesh Assembly Election)

पंजाबमधील (Punjab) 'आप'चा विजय हा पक्षाचा कोणत्याही राज्यातील पहिला विजय असून, 2017 मध्येही आम आदमी पक्षाने पंजाब विधानसभेची निवडणूक लढवली आणि काँग्रेसनंतर दुसरा सर्वात मोठा पक्ष म्हणून उदयास आला. पंजाबमध्ये यावेळी काँग्रेसला आपली सत्ता वाचवता आली नाही, तर 117 पैकी केवळ 18 जागा जिंकता आल्या. दुसरीकडे आम आदमी पक्षाने 92 जागा जिंकत मोठे यश मिळवले.

उत्तरेनंतर आप उतरणार दक्षिणेत; घेतला मोठा निर्णय

दिल्ली आणि पंजाबमधील घवघवीत यशानंतर आता आप आता दक्षिण भारतात मोठी सदस्यत्व मोहीम सुरू करणार आहे, अशी माहिती आपचे वरिष्ठ नेते सोमनाथ भारती यांनी दिली आहे. भारती म्हणाले की, पक्षाने दक्षिणेकडील राज्यांमध्ये टप्प्याटप्प्याने पायी मोर्चा काढण्याचा निर्णय घेतला असून बी.आर. आंबेडकर यांच्या जयंतीदिनी 14 एप्रिल रोजी तेलंगणातून याची सुरुवात होणार आहे.

तेलंगणा, आंध्र प्रदेश, तामिळनाडू, केरळ, पुद्दुचेरी, अंदमान आणि निकोबार आणि लक्षद्वीपमध्ये सदस्यत्व मोहीम सुरू करणार आहे. पंजाबमध्ये 'आप'च्या दणदणीत विजयानंतर दक्षिण भारतातील लोकांनी पक्षाबद्दल आस्था दाखवायला सुरुवात केली आहे असेदेखील भारती यांनी सांगितले.