नवी दिल्ली : भारतीय जनता पक्षाच्या ‘संपर्क फॉर समर्थन’उपक्रमांतर्गत पक्षाचे गेम चेंजर म्हणून ओळख असलेले राष्ट्रीय अध्यक्ष अमित शाह यांनी रविवारी भारताचा सर्वोत्तम फिनिशर महेंद्रसिंह धोनीची भेट घेतली. 

शहा यांनी धोनीची भेट घेत केंद्र सरकारने गेल्या चार वर्षांमध्ये केलेल्या कामाचा लेखाजोखा त्यांनी मांडला आणि सोबत सरकारने केलेल्या कामांची माहिती असलेली एक पुस्तिकाही भेट दिली. यावेळी शाह यांच्यासह केंद्रीय मंत्री पियूष गोयल आणि पक्षाचे अन्य ज्येष्ठ नेते उपस्थित होते.

या भेटीनंतर अमित शाह यांनी ट्विटरद्वारे या भेटीबाबत सांगताना म्हटले आहे, की ‘संपर्क फॉर समर्थन’उपक्रमांतर्गत जागतिक क्रिकेटमधल्या सर्वोत्कृष्ट फिनिशरची भेट घेतली. पंतप्रधान मोदींनी गेल्या चार वर्षांमध्ये राबवलेल्या उपक्रमांबाबत त्यांना माहिती दिली.

आगामी लोकसभा निवडणुकांच्या पार्श्वभूमीवर भाजपाने ‘संपर्क फॉर समर्थन’ हा उपक्रम सुरु केला असून या अंतर्गत विविध क्षेत्रातील मान्यवर मंडळीची भेट घेऊन सरकारने केलेल्या कामकाजाची माहिती दिली जात आहे. यापूर्वी अमित शाह यांनी अभिनेत्री माधुरी दीक्षित, उद्योगपती रतन टाटा, गायिका लता मंगेशकर, घटना तज्ज्ञ सुभाष कश्यप, स्टार बॅडमिंटन सायना नेहवाल, योग गुरु बाबा रामदेव, माजी क्रिकेटपटू कपिल देव यांचीही भेट घेतली आहे.