नवी दिल्ली: राजधानी दिल्लीतील द्वारका या सुखवस्तू भागामध्ये पाच गुंडांनी भारतीय लष्करातील कॅप्टन हुद्यावरील अधिकारी आणि त्यांच्या कुटुंबीयांना जबर मारहाण केल्याचे उघड झाले. कॅ. विकास यादव असे या अधिकाऱ्याचे नाव असून, सर्व गुंडांना अटक झाली आहे.

कॅ. यादव हे त्यांची पत्नी, बहीण, मेहुणे आणि मुलांसह 13 मे रोजी द्वारका भागातील एका हॉटेलमधून भोजन करून बाहेर पडले असताना एक स्कॉर्पिओ गाडी त्यांच्याजवळ थांबली आणि गाडीतील गुंडांनी यादव यांच्याबरोबरील महिलांशी असभ्य भाषेत बोलण्यास सुरवात केली. यादव आणि त्यांच्या मेहुण्याने जाब विचारला असता गाडीतून पाच जण बाहेर आले आणि त्यांनी यादव यांना मारहाण करण्यास सुरवात केली. डोक्‍यात काचेची बाटलीही फोडल्याने यादव हे जखमी झाले. पोलिसांत तक्रार केल्यास महिलांवर बलात्कार करण्याची धमकीही या गुंडांनी दिली. हे गुंड पळून जात एक जण गाडीबाहेरच राहिला. यादव यांनी दोन किलोमीटर पळत जाऊन त्याला पकडले. महंमद अर्शद अली हाशमी असे या गुंडाचे नाव आहे. त्याच्याकडून काढून घेतलेल्या माहितीवरून इतर सर्वांनाही अटक करण्यात आली.