दिल्ली - पंतप्रधान नरेंद्र मोदी (PM Narendra Modi) यांनी व्हिडिओ कॉन्फरन्सच्या माध्यमातून आज स्वातंत्र्याचा अमृत महोत्सवांतर्गत (Azadi Ka Amrit Mahotsav) आय़ोजित स्वर्णिम भारत (Swarnim Bharat) या कार्यक्रमात सहभाग घेतला होता. पंतप्रधान मोदींनी म्हटलं की, ब्रह्माकुमारी संस्थेकडून आज स्वांत्र्याचा अमृत महोत्सव कार्यक्रमाची सुरुवात होत आहे. या कार्यक्रमात स्वर्णिम भारतासाठी भावना आणि साधना (तपस्या) दोन्ही आहेत. यामध्ये देशासाठी प्रेरणासुद्धा आहे आणि ब्रह्माकुमारींचे प्रयत्नसुद्धा आहेत.

देशाच्या प्रगतीमध्येच आपली प्रगती आहे. आपल्यामुळे देशाचं अस्तित्व आहे आणि देशामुळे आपलं. हा भाव, हा धडा नव्या भारताच्या निर्मितीत आपल्या भारतवासियांची सर्वात मोठी शक्ती म्हणून उदयास येत आहे. आज जे काही देश करत आहे त्यामध्ये सर्वांचा प्रयत्न असल्याचंही मोदींनी म्हटलं.

मोदींनी आपल्या भाषणात नवा भारत उदयास येत आहे असं सांगताना म्हटंल की, आज आपण एक अशी व्यवस्था निर्माण करत आहे ज्यामध्ये कोणत्याही भेदभावाला जागा नसेल. एक असा समाज, जिथं समानता आणि सामाजिक न्याय असेल, तो या दोन्हींच्या पायावर उभा असेल. आपण एका अशा भारताला उदयास येताना पाहतोय ज्याचा विचार आणि दृष्टीकोन नवा आहे, निर्णय़ प्रगतशील असे आहेत.