Bengaluru Rameshwaram cafe blast : बंगळूरु येथील रामेश्वरम कॅफे बॉम्बस्फोट प्रकरणाचा तपास राष्ट्रीय तपास यंत्रणाने (एनआयए) तीव्र केला असून बॉम्ब ठेवलेल्या संशयित दहशतवाद्याचा फोटो प्रसिद्ध केला आहे. दरम्यान, या संदर्भात माहिती देणाऱ्यास दहा लाख रुपयांचे बक्षीस जाहीर केले आहे.

एनआयए अधिकाऱ्यांनी अधिकृतपणे रामेश्वरम कॅफे बाँबस्फोटाचा तपास व्यापक केला असून आता बॉम्ब ठेवलेल्या संशयित दहशतवाद्याचा फोटो प्रसिद्ध केला आहे. या बॉम्ब ठेवलेल्या संशयिताची माहिती देणाऱ्याला दहा लाख रुपयांचे बक्षीस देण्याची घोषणाही केली आहे.

यापूर्वी सीसीबीने केलेल्या तपासादरम्यान बॉम्ब ठेवलेल्या संशयिताचा मास्क न लावलेला फोटो सापडला होता. आता तो फोटो एनआयएने प्रसिद्ध केला आहे. एनआयएच्या अधिकाऱ्यांनी मंगळवारी कॅफेला भेट देऊन जागेची पाहणी केली. कॅश काउंटर, सीसीटीव्ही कॅमेरा तपासला आणि कर्मचाऱ्यांकडून माहिती घेतली. पोलिसांनी घटनास्थळी विविध ३८ नमुन्यांची माहितीही एनआयए अधिकाऱ्यांना दिली आहे.

महत्वाचा धागा हाती

गृहमंत्री जी. परमेश्वर यांनी बुधवारी पत्रकारांशी बोलताना सांगितले की, पोलिसांना बंगळूरमधील रामेश्वरम कॅफेमध्ये झालेल्या कमी-तीव्रतेच्या बाँबस्फोटाबाबत एक महत्त्वाचा सुगावा मिळाला आहे आणि ते लवकरच या प्रकरणाचा छडा लावतील. दोन दिवस तपास करणाऱ्या पोलिसांना आणखी काही महत्त्वाचे धागेदोरे मिळाले आहेत. आम्ही हे प्रकरण गांभीर्याने घेतले आहे. या प्रकरणी अद्याप कोणालाही अटक केलेली नाही. संशयाच्या आधारे पोलिसांनी काही जणांना ताब्यात घेतले आणि त्यांच्याकडून माहिती घेत आहेत.

नाव गुपित ठेवणार

एनआयएने नागरिकांना विनंती केली आहे की, अशी व्यक्ती दिसल्यास त्यांनी ताबडतोब ०८०-२९५१०९००, ८९०४२४११०० या दूरध्वनी किंवा मोबाईलवर माहिती द्यावी. माहिती देणाऱ्याचे नाव गुपित ठेवले जाईल.