अलिगड : लोकसभा निवडणुकीत "बुआ-भतिजा' यांच्या दुकानाला भाजपचे कार्यकर्ते "अलिगडी कुलूप' लावतील, अशी टीका भाजपचे अध्यक्ष अमित शहा यांनी आज येथे केली. समाजवादी पक्षाचे अध्यक्ष अखिलेश यादव आणि बहुजन समाज पक्षाच्या सर्वेसर्वा मायावती यांचे नाव न घेता शहा यांनी ही तोफ डागली. 

लोकसभा निवडणुकीसाठी सप-बसप यांची युती झाली असून, शहा यांच्या टीकेचा रोख त्यावर होता. एकेकाळी कुलपांच्या निर्मितीसाठी अलिगड शहर प्रसिद्ध होते. त्याचा आधार घेत शहांनी पक्षाच्या बूथ पातळीवरील कार्यकर्त्यांपुढे बोलताना हा संदर्भ वापरला. सप-बसप युती झाली असताना भाजप उत्तर प्रदेशात 74 जागा कशा मिळवणार, असा प्रश्‍न पत्रकार मला करतात; पण कार्यकर्त्यांची ही गर्दी पाहिल्यावर एवढ्या जागा कशा मिळतील याचे उत्तर मिळेल, असे शहा म्हणाले. 

लोकसभेच्या 2014 च्या निवडणुकीत भाजप आणि त्याचा मित्र पक्ष असलेल्या अपना दल यांनी 80 पैकी 73 जागा मिळविल्या होत्या. यंदा भाजपने आणखी एक जागा जास्त मिळविण्याचे उद्दिष्ट ठेवले आहे. आगामी निवडणूक पंतप्रधान नरेंद्र मोदी विरुद्ध अन्य पक्ष अशी होईल, असे सांगून शहांनी उत्तर प्रदेशचे मुख्यमंत्री योगी आदित्यनाथ यांच्या कामाची प्रशंसा केली.

माफिया गुंडांना योगींनी वेसण घातली असून, "ऊपर मोदी, नीचे योगी' असे सध्याचे चित्र असल्याचे ते म्हणाले. कॉंग्रेस विभाजनाचे राजकारण करत असून, सप-बसप त्याला साथ देत असल्याचा आरोप योगी आदित्यनाथ यांनी केला.