बेळगाव : सौंदत्ती येथील रेणुका देवीच्या (Saundatti Renuka Devi) दर्शनासाठी देशभरातून मोठ्या संख्येने भाविक येतात. मंदिराच्या दानपेटीत गेल्या चाळीस दिवसांत देणगी स्वरूपात एक कोटी तीन लाख रुपये जमा झाले.

१७ ऑगस्ट ते २५ सप्टेंबरपर्यंत देणगी पेटीत जमा झालेल्या देणगीची मोजदाद करण्यात आली. त्यात ९३ लाख ६४ हजार २६० रुपयांची रोख देणगी जमा झाली आहे. यासह ७ लाख ५० हजार २६० रुपये किमतीचे सोने, १ लाख ८७ हजार ८६० रुपये किमतीची चांदी देणगी स्वरूपात मिळाली.

दोन हजार रुपये मूल्याच्या नोटाही दानपेटीत सापडल्या. त्यामुळे भाविकांनी या नोटा दानपेटीत न टाकता त्या बदलून घ्याव्यात, असे आवाहन सौंदती मंदिर देवस्थान मंडळाने केले आहे. मंदिराचे मुख्य कार्यकारी अधिकारी एमपीबी महेश, देवस्थान व्यवस्थापन समितीचे पदाधिकारी, मंदिराचे कार्यकारी अधिकारी, जिल्हाधिकारी कार्यालयाचे कर्मचारी, धर्मादाय खाते, तहसीलदार आणि सौंदत्ती पोलिसांच्या उपस्थितीत मंदिरातील दानपेटी उघडण्यात आली.

देणगी स्वरूपात मिळालेल्या रकमेतून डोंगरावर पिण्याचे पाणी, रस्ते, पथदीप आणि इतर विकासकामे केली जाणार आहेत. याप्रसंगी धर्मादाय खात्याचे सहायक आयुक्त बसवराज जिरग्याळ, मंदिराचे अधीक्षक अरविंद माळगे, सदस्य वाय. वाय. काळप्पणावर, लक्ष्मी हुली आदी उपस्थित होते.