नवी दिल्ली - पीक विमा ऐच्छिक करण्याच्या मोदी सरकारच्या निर्णयावर काँग्रेसने आज जोरदार आगपाखड केली. पंतप्रधान पीक विमा योजना आणि हंगामी पीक विमा योजनेवर सरकारतर्फे दिल्या जाणाऱ्या प्रीमियममध्ये १०० टक्के कपात करून शेतकऱ्यांना वाऱ्यावर सोडल्याची तोफ काँग्रेसने डागली. 

ताज्या बातम्यांसाठी डाऊनलोड करा ई-सकाळचे ऍप

काँग्रेसचे मुख्य प्रवक्ते रणदीप सुरजेवाला यांनी सरकारवर टीकास्त्र सोडले. पीक विमा योजनेमध्ये दोन टक्के प्रीमियम शेतकरी, तर ९८ टक्के प्रीमियम केंद्र आणि राज्य सरकारतर्फे ५०-५० टक्के दिला जात होता. परंतु मोदी सरकारने काल तुघलकी फर्मान काढून केंद्रातर्फे दिल्या जाणाऱ्या प्रीमियमचे प्रमाण 25 टक्के केले. 

राज्यांनी ५० टक्के प्रीमियम देण्यास उशीर केला, तर दोन्ही पीक विमा योजना त्या राज्यांमध्ये बंद केल्या जातील, असेही सरकारने ठरविले आहे. असे असताना राज्य सरकारांनीही केंद्राप्रमाणे प्रीमियमला कात्री लावली तर गरीब शेतकऱ्यांना पीक विमा काढता येणार नाही. याखेरीज १५१ जिल्ह्यांसाठी नवी योजना बनविण्याचीही सरकारची घोषणा पाहता देशभरातील ७३२ जिल्ह्यांपैकी १५१ आपत्तिग्रस्त जिल्ह्यांना पीक विमा योजना लागू होणार नाही. साहजिकच सरकारचा निर्णय शेतकरी विरोधी आहे, असा हल्लाबोल सुरजेवाला यांनी केला.