बंगळूर : कोणत्याही परिस्थितीत राज्यातील आघाडी सरकारचे पतन करण्याचा प्रयत्न करणार नाही. परंतु आघाडी पक्षांच्या मतभेदातून सरकारचे पतन झाल्यास जरूर सरकार स्थापन करू, असे स्पष्टीकरण भाजपचे प्रदेशाध्यक्ष व माजी मुख्यमंत्री बी. एस. येडियुरप्पा यांनी केले. ते पत्रकारांशी बोलत होते. 

येडियुरप्पा म्हणाले, "सध्याच्या परिस्थितीत कोणीच आमदार निवडणूक लढविण्याच्या मनस्थितीत नाहीत. मध्यावधी निवडणूक व्हावी, अशी आमचीसुद्धा इच्छा नाही. परंतु युती सरकारचे पतन झाल्यास सर्वांत मोठा पक्ष म्हणून हात बांधून बसणे शक्‍य आहे का? कॉंग्रेस व जेडीएसमधील संबंध दिवसेदिवस बिघडत आहेत. दोन्ही पक्षांत असंतोष व मतभेद वाढत आहेत. त्यातून सरकारचे पतन होण्याची शक्‍यता नाकारता येत नाही. आम्ही मात्र सरकारचे पतन करण्याच्या भानगडीत पडणार नाही.' 

ते म्हणाले, की 5 जूनला पक्षाच्या सुकाणू समितीची बैठक बोलविण्यात आली आहे. बैठकीत पुढील आंदोलनाची दिशा ठरविण्यात येईल. शेतकऱ्यांना रासायनिक खते व बियाण्यांचा पुरवठा, पिण्याचे पाणी, जनावरांसाठी चारा यासह राज्याच्या विविध समस्या सोडविण्याच्या मागणीसाठी आंदोलन हाती घेण्यात येईल. जिंदाल कंपनीला देण्यात आलेली बळ्ळारी जिल्ह्यातील जमीन परत घेण्यात यावी, कोणत्याही कारणास्तव जमीन देण्यात येऊ नये. यासाठी पक्षाच्या वतीने आंदोलन हाती घेण्याची तयारी सुरू आहे.'