नवी दिल्ली : मद्य धोरण गैरव्यवहार प्रकरणात गंभीर आरोप झालेले दिल्लीचे मुख्यमंत्री अरविंद केजरीवाल, बीआरएसच्या नेत्या के. कविता तसेच अन्य आरोपी चनप्रीत सिंह यांच्या न्यायालयीन कोठडीत ७ मे पर्यंत वाढ झाली आहे. दरम्यान, तिहार तुरुंगात पहिल्यांदाच केजरीवाल यांना इन्शुलिन देण्यात आले आहे.

सक्तवसुली संचलनालयाने २१ मार्च रोजी केजरीवाल यांना त्यांच्या राहत्या घरातून अटक केली होती. या अटकेला केजरीवाल यांनी राउज अव्हेन्यू न्यायालयात आव्हान दिले आहे. केजरीवाल यांच्या याचिकेवर मंगळवारी सुनावणी झाली असता न्यायालयाने त्यांची कोठडी ७ मे पर्यंत वाढवली. या प्रकरणातील आरोपी बीआरएस नेत्या के. कविता यांना दिलासा देण्यासही न्यायालयाने नकार दिला आहे. दिल्लीच्या मुख्यमंत्र्यांना तिहार तुरुंगात इन्शुलिन दिले जात नसल्याचा आरोप आम आदमी पक्षाने केल्याच्या पार्श्वभूमीवर केजरीवाल यांना पहिल्यांदाच इन्शुलिन देण्यात आले आहे.

दरम्यान, केजरीवाल यांच्या शरीरातील साखरेचे प्रमाण ३२० च्या वर पोचले होते, अशी माहिती आप सूत्रांकडून देण्यात आली. जास्त गरज असेल तरच इन्शुलिन दिले जावे, असा सल्ला एम्स रुग्णालय प्रशासनाकडून देण्यात आला होता. त्यानुसार सोमवारी रात्री केजरीवाल यांना इन्शुलिन देण्यात आले. इन्शुलिन देण्याच्या मुद्द्यावरुन आप आणि भाजप आमनेसामने आले होते. आप कार्यकर्त्यांनी इन्शुलिन हातात घेत तुरुंगासमोर निदर्शने केली होती. केजरीवाल यांची हत्या करण्याचा कट रचण्यात आला असल्याचा आरोप आप नेत्यांकडून करण्यात आला होता.