नवी दिल्ली ः मद्यधोरण गैरव्यवहार प्रकरणातील आरोपी आणि आम आदमी पक्षाचे (आप) नेते मनीष सिसोदिया यांच्या कोठडीत राऊज अव्हेन्यू न्यायालयाने सात मे पर्यंत वाढ केली आहे. याच प्रकरणात आरोप असलेले दिल्लीचे मुख्यमंत्री अरविंद केजरीवाल तसेच भारत राष्ट्र समितीच्या(बीआरएस) नेत्या के. कविता यांची कोठडी अलीकडेच न्यायालयाने वाढवली होती.

केंद्रीय अन्वेषण विभागाकडून (सीबीआय) दाखल करावयाच्या दोषारोप पत्राच्या अनुषंगाने न्यायालयात स्वतंत्र सुनावणी झाली. यावेळी एक तक्ता बनवून सिसोदिया यांच्याविरोधातील पुरावे द्यावेत, असे निर्देश न्यायालयाने दिले. मद्यधोरण गैरव्यवहार प्रकरणी सीबीआयने गतवर्षीच्या फेब्रुवारी महिन्यात सिसोदिया यांना अटक केली होती. त्यानंतर सक्तवसुली संचालनालयाकडून (ईडी) नऊ मार्च २०२३ रोजी सिसोदिया यांना अटक झाली होती.