नोएडा : एका सहा वर्षीय बालिकेवर 48 वर्षीय पोलिस कॉन्स्टेबलने बलात्काराचा प्रयत्न केला. ही घटना ग्रेटर नोएडा येथे घडली. याप्रकरणी पोलिसांनी संबंधित पोलिस कॉन्स्टेबलला अटक केली आहे. या धक्कादायक प्रकारामुळे परिसरात तणाव निर्माण झाला. 

याप्रकरणी पोलिसांनी संशयित नरेंद्र या पोलिस कॉन्स्टेबलला अटक केली. जेव्हा हा प्रकार घडला तेव्हा नरेंद्र हा वर्दीमध्ये होता. त्यामुळे तो पोलिस असल्याचे लक्षात आले. हा प्रकार शनिवारी सकाळी कुलेसरा पोलिस चौकीच्या मागील बाजूस घडला. त्याने पीडित बालिकेला चौकीच्या मागील बाजूस नेत तिच्यावर बलात्कार करण्याचा प्रयत्न केला. या गंभीर घटनेची माहिती मिळाल्यानंतर कुलेसरा गावात राहणाऱ्या बालिकेच्या नातेवाईकांनी पोलिस ठाण्यावर मोर्चा काढला आणि नरेंद्र या पोलिस कर्मचाऱ्याला तत्काळ अटक करावी, अशी मागणी केली. 

''याप्रकरणाची माहिती मिळाल्यानंतर संबंधित पोलिस कॉन्स्टेबलला सेवेतून तत्काळ बडतर्फ करण्यात आले आहे. सदर पोलिस कॉन्स्टेबलविरोधात पॉस्को कायद्यांतर्गत अजामीनपात्र गुन्हा दाखल करण्यात आला आहे'', असे पोलिस अधीक्षक सुनिती यांनी सांगितले.