नवी दिल्ली : बॅंकांप्रमाणेच टपाल विभागातील भरतीसाठी घेण्यात येणाऱ्या परीक्षाही आता हिंदी व इंग्रजीप्रमाणे सर्व, म्हणजे 22 प्रादेशिक भाषांमध्ये घेण्यात येतील, असे आश्वासन दूरसंचारमंत्री रविशंकर प्रसाद यांनी आज राज्यसभेत दिले. या गोंधळामुळे आज राज्यसभेचा प्रश्नोत्तर तासात आणि शून्य तास होऊ शकला नाही. 

टपाल विभागाच्या आगामी महिन्यात होणाऱ्या परीक्षा हिंदी-इंग्रजीत घेण्यात येणार असून, त्या तमीळ व सर्व भारतीय भाषांमध्ये घ्याव्यात या मागणीसाठी अण्णा द्रमुक व द्रमुकने आज राज्यसभेचे कामकाज पूर्वार्धात रोखून धरले. प्रसाद यांनी तातडीने सभागृहात येऊन स्पष्टीकरण करावे, अशी त्यांची मागणी होती. मात्र, आपल्याला याबाबत सविस्तर माहिती घ्यावी लागेल, लगेच देता येणार नाही व उद्या सकाळी आपण राज्यसभेसमोर येऊ, असे प्रसाद यांच्याकडून सांगण्यात आले. या गोंधळामुळे आजच्या संपूर्ण दिवसाचे कामकाज पाण्यात जाण्याची चिन्हे दिसल्यावर त्यावर राज्यसभाध्यक्ष वेंकय्या नायडू यांनी प्रसाद यांना लवकरात लवकर सभागृहात येण्याची सूचना केली. 

प्रसाद यांनी सांगितले की, टपाल खात्याच्या परीक्षेबाबत सर्व माहिती घेतली. या प्रकरणाचा आढावा घेतला असता; केवळ हिंदी आणि इंग्रजीतून परीक्षा घेतल्याने राज्यांमधील स्थानिक विद्यार्थ्यांवर अन्याय होतो, या म्हणण्यात तथ्य आहे. त्यामुळे टपाल विभागाच्या परीक्षा तमीळसह सर्व प्रादेशिक भाषांमध्ये घेतल्या जाव्यात, असा आदेश आपण तातडीने दिला आहे. प्रसाद यांच्या या घोषणेनंतर अण्णा द्रमुक आणि कॉंग्रेसच्या सदस्यांनी त्यांचे आभार मानले.