वाराणसी : पंतप्रधान नरेंद्र मोदी यांना आज (सोमवार) वाराणसीत जाऊन काशी विश्वेश्वरचा पूजा करून, मताधिक्य दिल्याबद्दल मतदारांचे आभार मानले. 

लोकसभा निवडणुकीतील प्रचंड यशानंतर पंतप्रधान नरेंद्र मोदी यांनी आज वाराणसी गाठली. मोदी रविवारी गुजरातमध्ये भाजप कार्यालयात आयोजित कार्यक्रमात जनतेशी संवाद साधला होता. तसेच त्यांनी आई हिराबेन यांचा आशीर्वाद घेतला होता. मोदी पुन्हा 30 मे रोजी पंतप्रधानपदाची शपथ घेणार आहेत. त्यापूर्वी ते वाराणसीतील मतदारांचे आभार मानण्यासाठी वाराणसीत आले आहेत. मोदी आज कार्यकर्त्यांनाही संबोधित करणार आहेत.

मोदींच्या या दौऱ्यावेळी भाजप अध्यक्ष अमित शहा, उत्तर प्रदेशचे मुख्यमंत्री योगी आदित्यनाथ उपस्थित होते. आज सकाळी वाराणसी पोहचताच त्यांनी काशी विश्वेश्वराचे मंदिर गाठून तेथे पूजा केली. मोदींना पाहण्यासाठी वाराणसीतील नागरिकांनी रस्त्याच्या दुतर्फा गर्दी केली होती.