बेळगाव : खानापूर उपविभागाचे सहाय्यक वनसंरक्षक अधिकारी (एसीएफ) चंद्रगौडा बी. पाटील यांच्यावर आज लाचलुचपत प्रतिबंधक विभागाने (एसीबी) छापा टाकला. बेळगावातील समर्थनगर, हनुमान नगर तसेच बैलहोंगल येथील घर व खानापूर येथील त्यांच्या कार्यालयावर एकाच वेळी छापे टाकण्यात आले. दुपारपर्यंत त्यांच्याकडे रोकड, स्थावर मालमतेची कागदपत्रे, सोन्याचांदीचे दागिने व दोन जेसीबी असल्याचे स्पष्ट झाले आहे.

बेळगावसह गदग व धारवाडच्या पथकाने संयुक्तरित्या आज पहाटे सहा वाजता कारवाईस प्रारंभ केला. पाटील यांच्या मालकीची रामतीर्थनगर व हनुमान नगर येथे घरे असल्याचे स्पष्ट झाले आहे. यरगट्टी (ता. सौन्दत्ती) येथे त्यांच्या मालकीचा विटांचा कारखाना आहे. बैलहोंगल येथे त्यांच्या भावाच्या नावावर दोन जेसीबी आहेत. त्या त्यांच्यात मालकीच्या आहेत का याची शहानिशा ही पथकाकडून करण्यात येत आहे. शिवाय आतापर्यंतच्या तपासात सहा लाख रुपयांची रोख रक्कम, सोन्या चांदीचे दागिने मिळाले आहेत. आज सायंकाळपर्यंत मालमत्ता व किमती ऐवज आणखी वाढण्याची शक्यता आहे, त्याचा तपशील सायंकाळी दिला जाईल, अशी माहिती लाचलुचपत प्रतिबंधक विभागाचे पोलीस अधीक्षक अमरनाथ रेड्डी यांनी 'सकाळ'ला दिली.