नवी दिल्ली : श्रद्धा वालकर हत्याप्रकरणातील आरोपी आफताब पुनावालाच्या कोठडीत आणखी चार दिवसांची वाढ करण्यात आली. तसेच न्यायालयाने त्याच्या पॉलिग्राफ चाचणीला परवानगी दिली आहे. आफताबला महानगर दंडाधिकारी अविरल शुक्ला यांच्यासमोर हजर करण्यात आले. त्याची पाच दिवसाची कोठडी आज संपली. दरम्यान, आफताबच्या पॉलिग्राफ चाचणीला सुरवात झाल्याचे सांगण्यात आले.

बार ॲड बेंच आणि अन्य माध्यमांच्या संकेतस्थळाचा संदर्भ देत,‘‘आफताब याने न्यायालयात हत्येची कबुली दिली. हे कृत्य रागाच्या भरात केल्याचे पुनावाला याने मान्य केले ’’, अशा आशयाचे वृत्त सर्वत्र व्हायरल झाले. हे वृत्त आल्यानंतर तासाभरातच आरोपी आफताबच्या वकिलाने अविनाशकुमार यांनी हे वृत्त अफवा असल्याचे सांगत आफताबने असा कबुलीजबाब दिलेला नाही, असे स्पष्ट केले. सायंकाळी आफताबच्या पॉलिग्राफ चाचणीला सुरवात झाली.

सीबीआय चौकशीची मागणी फेटाळली

मुंबईच्या श्रद्धा वालकर हत्या प्रकरणाचा तपास सीबीआयकडे द्यावा अशी मागणी करणारी जनहित याचिका आज दिल्ली उच्च न्यायालयाने फेटाळून लावत याचिकाकर्त्याला फटकारले. दिल्ली न्यायालयाचे मुख्य न्यायाधीश सतीश चंद्र शर्मा आणि न्यायाधीश सुब्रह्मण्यम प्रसाद यांनी याचिका फेटाळून लावली. ही एक प्रसिद्धी मिळवणारी याचिका होती आणि सीबीआयकडे तपास का द्यावा, याचे कोणतेही स्पष्टीकरण याचिकेत नव्हते, असे न्यायालयाने सांगितले. दिल्ली पोलिसांच्या तपासावर संशय का घ्यायचा? असा सवालही न्यायालयाने उपस्थित केला. याचिकाकर्त्या वकील जोशिनी तुली यांना न्यायालयाने दंडही ठोठावला.