श्रीनगर : भारतीय लष्कराने पाकव्याप्त काश्मीरात घुसून सर्जिकल स्ट्राईकची कारवाई केली होती. ही कारवाई दोन वर्षांपूर्वी करण्यात आली. या कारवाईतील वीरजवान लान्सनायक संदीप सिंह एका चकमकीदरम्यान हुतात्मा झाले आहेत. तसेच सिंह यांनी तीन दहशतवाद्यांचा खात्मा केला.     

लष्करातील लान्सनायक या पदावर कार्यरत असलेले संदीप सिंह हे पंजाबमधील गुरुदासपूरचे रहिवासी होते. भारतीय लष्करातील जवान आणि दहशतवाद्यांमध्ये झालेल्या कारवाईत संदीप सिंह यांना वीरमरण आले. 4 पॅरा कमांडो पथकांच्या साथीने तंगधार सेक्टरमधील गगाधारी भागात दहशतवाद्यांची शोधमोहिम सुरु केली होती. लष्कराच्या 'ऑपरेशन ऑलआऊट' कारवाईदरम्यान त्यांना काही संदिग्ध हालचाली दिसून आल्या. या कारवाईत दहशतवाद्यांकडून झालेल्या गोळीबाराला सिंह यांच्या पथकाने जोरदार प्रत्युत्तर दिले. मात्र, दहशतवाद्यांकडून सुरु असलेल्या गोळीबारात सिंह यांना गोळी लागून ते जखमी झाले. त्यानंतर दहशतवाद्यांनी गोळीबार सुरुच ठेवला होता. यामध्ये संदीप सिंह यांना वीरमरण आले.