पुणे - जुलैचा शेवटचा आठवडा उजाडला तरीही पाच वर्षाच्या आर्किटेक्चरच्या पदवी अभ्यासक्रमाची प्रवेश प्रक्रिया अजूनही सुरू झालेली नाही. वास्तुकला परिषदेच्या नॅशनल अप्टिट्यूड टेस्ट इन आर्किटेक्चर (नाटा) या परीक्षेचा निकाल घोषित होऊन तीन दिवस लोटले, तरीही राज्य सामाईक प्रवेश परीक्षा कक्षाकडून (सीईटी सेल) यंदाचे प्रवेश वेळापत्रक जाहीर करण्यात आलेले नाही.

सीईटी सेलने प्रवेशासाठी नोंदणी प्रक्रिया सुरू करण्याची संभाव्य तारीख १८ जुलै जाहीर केली होती. पण तीन दिवसांनंतरही ही प्रक्रिया सुरू करता आलेली नाही. त्यामुळे इच्छूक विद्यार्थी व त्यांचे पालक हतबल झाले आहेत.

राज्यातील सर्व व्यावसायिक अभ्यासक्रमांची ऑनलाईन प्रवेश प्रक्रिया सुरू झाली आहे. केवळ आर्किटेक्चरच्या पदव्युत्तर पदवी अभ्यासक्रमाची प्रक्रिया काही दिवसांपूर्वीच सुरू झाली. त्यामुळे लवकरच पदवीची प्रक्रिया सुरू होईल, अशी अपेक्षा विद्यार्थ्यांना होती. पण अजूनही विद्यार्थी प्रतिक्षेत आहे.

सीईटी सेलकडून अधिकृत संकेतस्थळावर १८ जुलै ही प्रवेश प्रक्रिया सुरू करण्याची संभाव्य तारीख असल्याचे जाहीर केले. मात्र, तीन दिवस उलटूनही सीईटी सेलला ही प्रक्रिया सुरू करता आलेली नाही. त्यामुळे विद्यार्थ्यांमध्ये नाराजी पसरली आहे.