- डॉ. कोमल बोरसे

आपण गेल्या भागात अळिवाच्या काही गुणधर्मांबाबत माहिती घेतली. अळिव आरोग्यासाठी फायदेशीर आहे.

हिमोग्लोबिनचे प्रमाण वाढवते

अळिवाच्या बियांमध्ये लोहाचे उच्च प्रमाण म्हणजेच १०० ग्रॅममध्ये १०० मिलिग्रॅम लोह असते. ते लाल रक्तपेशींच्या उत्पादनास प्रोत्साहन देते आणि शरीरातील हिमोग्लोबिनची पातळी सुधारण्यास मदत करते.

दीर्घकाळात ते काही प्रमाणात ॲनिमियावर उपचार करण्यास मदत करू शकतात. शरीरात खनिजांचे शोषण वाढवण्यासाठी लोहासोबत ‘व्हिटॅमिन-सी’ युक्त पदार्थ खाण्याचा सल्ला दिला जातो. अळिव ‘व्हिटॅमिन-सी’चा समृद्ध स्रोत आहे.

स्तनदा मातांसाठी उपयुक्त

बियांमध्ये प्रथिने आणि लोह आणि इतर सगळेच पोषण तत्त्व मुबलकतेबरोबर गॅलेक्टोगॉग गुणधर्म असल्याने ते स्तनदा मातांसाठी फायदेशीर आहेत. स्तन्यपान करणाऱ्या मातांच्या आहारात अळिव बियांचा समावेश केलाच पाहिजे. स्तन्यपान करणाऱ्या मातांसाठी काजू आणि गोंड यांनी भरलेल्या लाडूमध्ये अळिव घालावा.

मासिक पाळीचे नियमन

गर्भधारणेचे नियोजन करण्यासाठी महिलांसाठी मासिक पाळीचे नियमन महत्त्वाचे आहे. अळिव बियांमध्ये भरपूर फायटोकेमिकल्स असतात, ते इस्ट्रोजेन हार्मोनचे नियमन करतात. त्यामुळे अनियमित मासिक पाळी नियमित होते.

वजन कमी करते

अळिव सोल्युबल फायबर आणि प्रथिनांचा समृद्ध स्रोत असल्याने, ते खाल्लेल्या अन्नाची तृप्ती वाढते. अतिरिक्त खाणे टाळण्यास मदत होते. या बियांमधील प्रथिनांचे चांगले प्रमाण शरीराचे स्नायू टिकवून ठेवण्यास आणि निरोगी वजन कमी करण्यास सक्षम करते.

बद्धकोष्ठता दूर होते

यामधील उच्च फायबरमुळे बद्धकोष्ठता आणि गॅस आणि ब्लोटिंग सारख्या समस्यांपासून मुक्त होण्यास मदत होते.

सॅलडसारख्या पदार्थांना सजवण्यासाठी अळिवच्या पानांचा वापर केला जातो. अळिवच्या बिया घालून सॅलड बनवता येते. अळिवच्या बिया टाकून सूप बनवले जातात. अळिवाचे फायदे खूप असले तरी डॉक्टरांच्या सल्ल्यानुसारच त्याचे सेवन करावे.(Latest Marathi News)