ओळखी-मध्यस्थीतून विवाहयोग

मेष : गुरू-शुक्राची पूर्ण साथसंगत राहील. घरात मोठ्या प्रमाणात आनंदाचं वातावरण राहील. अश्विनी नक्षत्राच्या व्यक्तींच्या आयुष्यात ओळखी-मध्यस्थीतून विवाहयोग. ता. ८ डिसेंबरचा शुक्रवार अनेक प्रकारांतून विक्रम नोंदवेल. उद्याचा सोमवार एकूणच मेष या आपल्या राशीस गतिमान राहील. भरणी नक्षत्राच्या व्यक्तींची एखादी पनवती दूर होईल. मोठी वसुली शक्य.

सरकारी कामं होतील

वृषभ : मंगळभ्रमणाचे थोडे हाय व्होल्टेज राहील. पित्तप्रकोप जपा. बाकी ता. ५ व ६ हे दिवस नोकरी-व्यावसायिक घडामोडींतून दिलासा देतील. कृत्तिका नक्षत्राच्या व्यक्तींची सरकारी काम होतील. रोहिणी नक्षत्राच्या व्यक्तींचे ता. ८ चा शुक्रवार एखादं आर्थिक संकट घालवेल. मृग नक्षत्राच्या व्यक्तींना दैवी प्रचितीचा अनुभव येईल.

असंगाशी संग टाळा

मिथुन : सप्ताहात गुरू आणि शनीचं सुप्रीम कोर्ट आपल्या बाजूने राहील. मृग नक्षत्राच्या व्यक्तींना थोरामोठ्यांचे उत्तम मार्गदर्शन लाभेल. आर्द्रा नक्षत्राच्या व्यक्तींचा सप्ताहाचा आरंभ आणि शेवट मोठा वेगवान राहील. पुनर्वसु नक्षत्राच्या व्यक्तींना असंगाशी संग भोवू शकतो. जुगार टाळा. बाकी नोकरीत भाग्योदय होईल.

खरेदी-विक्रीचे मोठे व्यवहार होतील

कर्क : गुरू-शुक्राची फिल्डिंग चांगल्याच धावा काढून देईल. सप्ताह गृहिणींना छानच. पुष्य नक्षत्राच्या व्यक्तींचे खरेदी-विक्रीचे मोठे व्यवहार होतील. उद्याचा सोमवार व्यावसायिक तेजीचा. आश्लेषा नक्षत्राच्या व्यक्तींना सप्ताहाचा शेवट मोठ्या उत्सव-समारंभातून मिरवेल. सहजीवन भावस्पंदनाचे राहील.

वरिष्ठांची मर्जी संपादन कराल

सिंह : शुभ ग्रहांची मांदियाळी मस्तच राहील. नोकरीत उत्तम घडामोडी घडतील. नोकरीत वरिष्ठांची मर्जी संपादन कराल. मघा नक्षत्राच्या व्यक्तींसाठी सुयोग्य विवाहस्थळे येतील. ज्योतिष आडवं आणू नका. पूर्वा नक्षत्राच्या व्यक्तींना सप्ताहाचा शेवट विजयी चौकार-षटकारांचाच. उत्तरा नक्षत्राच्या व्यक्तींनी खरेदी-विक्रीत सांभाळावे.

वादग्रस्त येणं वसूल होईल

कन्या : व्यावसायिक आर्थिक कोंडी जाईल. व्यावसायिक विलंबित वादग्रस्त येणे येईल. सप्ताहाचा शेवट अतिशय मजेदार फळे देईल. बँकेची कामे होतील. हस्त नक्षत्राच्या व्यक्तींचे मार्केटिंग यशस्वी होईल. वास्तुविषयक खरेदी-विक्रीचे व्यवहार पार पडतील. उत्तरा नक्षत्राच्या व्यक्तींना उत्तम नोकरी लागेल. चित्रा नक्षत्राच्या व्यक्तींनी प्रवासात सांभाळावे.

लक्ष वेधून घेणारा कालखंड

तूळ : राशीच्या एक्स्चेंजमध्ये लक्ष वेधून घेणारी रास राहील. चित्रा नक्षत्राच्या व्यक्तींचा रुबाब वाढेल. प्रेमप्रकरणे फुलतील. आपले अँटिने रोखून ठेवाच. स्वाती नक्षत्राच्या व्यक्तींनी खरेदी सांभाळून करावी. बाकी नोकरीत वरिष्ठांचा अनुग्रह प्राप्त होईल. विशाखा नक्षत्राच्या व्यक्तींना आजचा रविवार बाचाबाचीचा.

आहारविषयक पथ्यं पाळा

वृश्चिक : सप्ताह संमिश्र स्वरूपाची फळे देऊ शकतो. ज्येष्ठा नक्षत्राच्या व्यक्तींनी आहारविषयक पथ्ये पाळावीत. कोणतेही मध्यस्थीचे व्यवहार जपून. बाकी अनुराधा नक्षत्राच्या व्यक्तींना ता. ५ ते ८ हे दिवस व्यावसायिक सरकारी कामातून यश देतील. सहकुटुंब प्रवासयोग. नोकरीत प्रशंसा होईल.

विवाहातले अडथळे दूर होतील

धनु : गुरू-शनीचे सुप्रीम कोर्ट आपल्या बाजूने विशिष्ट निकाल देईल. मूळ नक्षत्राच्या व्यक्तींचे एखादे हृदयशल्य जाईल. तरुणांच्या विवाहाच्या मार्गातील अडथळे जातील. पूर्वाषाढा नक्षत्राच्या व्यक्तींना सप्ताहात एकूणच परिस्थितीजन्य लाभ होतील. उत्तराषाढा नक्षत्राच्या व्यक्तींना विशिष्ट घटनात्मक लाभ होतील.

जुन्या गुंतवणुकीतून लाभ होईल

मकर : सप्ताहात शुक्रभ्रमण ग्रहाचा पट ताब्यात घेईल. उत्तराषाढा नक्षत्राच्या व्यक्तींना एखादा मानाचा किताब मिळेल. नोकरीतील एक पर्व सुरू होईल. घरातील स्त्रीवर्गाचे अतिशय पाठबळ राहील. श्रवण नक्षत्राच्या व्यक्तींना जुन्या गुंतवणुकींतून लाभ होईल. सरकारी माध्यमातून लाभ. सप्ताहाचा शेवट एकूणच विजयोत्सवाचा. आजचा रविवार कलहजन्य शक्य.

मुलाबाळांचा सन्मान होईल

कुंभ : साडेसाती सप्ताहात विसराल. गुरू-शनीचे शुक्राशी होणारे योग मोठे तारक ठरतील. नोकरी-व्यावसायिक क्षेत्रात विशिष्ट विरोध शमेल अथवा मावळेल. शततारका नक्षत्राच्या व्यक्तींचे आत्मिक बळ वाढेल. मुलाबाळांचा सन्मान घडेल. पूर्वाभाद्रपदा नक्षत्राच्या व्यक्तींना स्पर्धात्मक यश मिळेल. भावाबहिणींचा भाग्योदय. धनिष्ठा नक्षत्राच्या व्यक्तींना स्त्रीकडून लाभ.

नोकरीत पगारवाढ होईल

मीन : विशिष्ट शत्रुत्व शमेल. नोकरीत पगारवाढ होईल. पूर्वाभाद्रपदा नक्षत्राच्या व्यक्तींना वसुलीतून लाभ. उत्तरा-भाद्रपदा नक्षत्राच्या व्यक्तींना ता. ७ व ८ हे दिवस मोठ्या सुवार्तांची परंपरा ठेवतील. व्यावसायिक उत्सव-प्रदर्शनं गाजतील. रेवती नक्षत्राच्या व्यक्तींना रविवार स्त्री हट्टातून त्रासाचा. प्रेमिकांनो जपून!