जळगाव : रिक्षातील प्रवाशांना लुटणारी टोळीला स्थानिक गुन्हे शाखेच्या पथकाने शहरातील शिरसोली नाका परिसरातून अटक केली आहे. त्यांच्याकडून १ लाख ९ हजार ३०० रुपयांचा मुद्देमाल हस्तगत करण्यात आला आहे. (Latest marathi news)

जळगाव जिल्ह्यात वेगवेगळ्या ठिकाणी रिक्षात प्रवाशांना बसवून त्यांना लुटण्याचे प्रकार सातत्याने घडत होते. या गुन्ह्यातील आणि रेकॉर्डवरील गुन्हेगार मासीन उर्फ शेमड्या पठाण व इतर साथीदार यांनी चोरी केल्याची माहिती स्थानिक गुन्हे शाखेच्या पथकाला मिळाली. त्यानुसार हेडकॉन्स्टेबल जितेंद्र पाटील, सुनील दामोदरे, अक्रम शेख, महेश महाजन, नितीन बाविस्कर, किरण धनगर, प्रमोद लाडवंजारी, भगवान पाटील, नंदलाल पाटील, ईश्वर पाटील, राजेंद्र पवार यांचे पथक तयार करून सापळा रचला.

त्याद्वारे डी-मार्ट परिसरातून संशयित आरोपी मोसीन खान उर्फ शेमड्या नुरखान पठाण (वय २८, रा. पिंप्राळा हुडको), अरशद शेख हमीद शेख (वय २३), शेख फिरोज शेख करीम (वय ३०) आणि मनोज विजय अहिरे (वय ३१, तिघे रा. गेंदालाल मिल), जळगाव यांना रिक्षासह ताब्यात घेतले. चौघांनी यावल आणि पारोळा येथील गुन्ह्यांची कबुली दिली आहे.