Jalgaon Municipality News : महापालिकेतर्फे ई वाहनांना प्रोत्साहन देण्यासाठी सद्यःस्थितीत शहरात दोन ठिकाणी चार्जिंग स्टेशन सुरू करण्यात येत आहेत. याबाबतचे कार्यादेश देण्यात आले असल्याची माहिती आयुक्त डॉ. विद्या गायकवाड यांनी दिली.

शहरात ई वाहनांची संख्या वाढत आहे. मात्र त्यांना शहरात चार्जिंगसाठी शहरात कोठेच व्यवस्था केलेली नाही. त्यामुळे वाहनधारकांना समस्या निर्माण होत आहे. (jalgaon Charging station at 2 locations in city for E vehicle)

यासाठी महापालिकेने शहरात सागरपार्क व बहिणाबाई उद्यान येथे चार्जिंग स्टेशन उभारण्याचे निश्चित केले होते. त्यासंदर्भात कार्यादेश देण्यात आले आहेत. त्यासाठी तेथे स्वतंत्र असा वीज पुरवठा, चार्जिंग स्टेशनला वाहन चार्जिंगसाठी लावल्यानंतर जेवढी वीज वापरली जाईल, त्यानुसार त्याचे पैसे द्यावे लागणार आहे.

महापालिकेतर्फे चार्जिंग स्टेशन उभारण्यात येत असल्याने आता ई वाहनधारकांना घराबाहेर तातडीने आपले वाहन चार्जिंग करता येणार आहे.

यामुळे ई वाहनधारकांना प्रोत्साहन मिळून शहरात वाढत्या प्रदूषणाला आळा बसणार आहे, असे महापालिकेच्या अधिकाऱ्यांनी सांगितले.

तसेच जळगाव महापालिका लवकरच शहरात ई बससेवा सुरू करीत आहे. त्यासाठीही या चार्जिंग स्टेशनचा वापर करण्यात येणार आहे. शहर बससेवेसाठी बसडेपोचा आराखडाही केंद्रांकडे पाठविण्यात आला असल्याची माहितीही त्यांनी दिली.