जळगाव : कोरोना संसर्गाला रोखण्यासाठी राज्यभरात संचारबंदी आहे. सुवर्ण बाजारासह अनेक वस्तूंची दुकाने, मॉल जी अत्यावश्‍यक नाहीत त्यांना लॉकडाउनमध्ये बंदी आहे. असे असले तरी सोन्याचे दर वधारणार असून, ५० हजारांचा टप्पा (दर १० ग्रॅम) पार करेल, असा विश्‍वास सराफ व्यावसायिकांना आहे. सध्या सोन्याचा दर दहा ग्रॅमसाठी ४७ हजार आहे.

गेल्या तीन आठवड्यांत सोन्याच्या दरात ५.४० टक्क्यांनी वाढ झाली. सध्या प्रतितोळा (दहा ग्रॅम) ४७ हजार १७५ असा दर आहे. कोरोनामुळे बँकांचे व्याजदर घटविले आहेत. इतर फंड, शेअरमध्येही हवा तसा परतावा मिळण्यास उशीर लागतो. मात्र सोन्यात केलेली गुंतवणूक केव्हाही फायद्याची असते. कारण सोने केव्हाही मोडता येते. त्या मुळे सोन्यात नागरिक गुंतवणूक आताही करीत आहेत. बाजारामध्ये असे बरेच घटक आहेत जे सोन्याला सहकार्य करतात. आंतरराष्ट्रीय बाजारपेठेत सोन्याने प्रतिऔंस १७५२ डॉलरचा भक्कम अवरोध ओलांडला आहे. तो प्रतिऔंस १७६२ डॉलरवर व्यापार करीत आहेत. त्याचवेळी बाजारपेठेत ४९ हजारा़पर्यंत सोने पोचले आहे. काही दिवसांपूर्वी सोने ४४ हजार रुपये प्रतितोळापर्यंत पोचले होते. त्यात दिवसेंदिवस वाढत होत आहे. कोरोना विषाणूची नवी लाट, जागतिक महागाईची भीती आदी कारणांमुळे सोन्यांच्या दरात वाढ झाली आहे.

अक्षयतृतीयेपर्यंत सोन्याच्या दरात वाढ

सध्या महाराष्ट्रात सोने व्यापार बंद आहे. असे असले तरी आंतरराष्ट्रीय पातळीवर सोने बाजार सुरूच आहे. सध्या भाव कमी असले तरी दिवसेंदिवस त्यात वाढ होत आहे. एकीकडे नागरिक कमी दरात सोने घेण्याच्या तयारीत आहे, तर दुसरीकडे सोन्याच्या बाजारपेठा बंद आहे. या मुळे सोन्यात गुंतवणुकीला नागरिक प्राधान्य देतात. कोरोनाचे सावट असल्याने अत्यावश्‍यक वगळता इतर व्यवसाय अनिश्‍चि‍त काळासाठी बंद आहेत. मागणी असल्याने सोने ५० हजारांचा टप्पा पार करेल. अक्षयतृतीयेपर्यंत सोन्याच्या दरात वाढ नक्की होणार.

सोने आता व्यवसाय बंद असताना ४८ हजारांवर पोचले आहे. लॉकडाउननंतर नक्कीच पन्नास हजार रुपये प्रतिदहा ग्रॅम असेल. नागरिकांची मागणी सोन्याला आहे. कारण केव्हाही सोने मोडून तत्काळ पैसे हातात येतात. अक्षयतृतीयेपर्यंत सोन्याचे दर वाढतील.

-मनोहर पाटील, व्यवस्थापक, रतनलाल सी बाफना ज्वेलर्स.

संपादन- भूषण श्रीखंडे