जळगाव : पालकमंत्र्यांच्या पाळधी येथील निवासस्थानासमोर भाजयुमोच्या कार्यकर्त्यांनी मध्यरात्री निषेधाची रांगोळी काढल्यानंतर वातावरण तापले होते. त्यातच आता मंगळवारी रात्री आमदार राजूमामा भोळेंच्या निवास व कार्यालयाबाहेर अज्ञात व्यक्तींनी खासदार उन्मेश पाटलांबद्दल (Unmesh Patil)आक्षेपार्ह मजकूर (Offensive text) लिहिल्याचा धक्कादायक प्रकार समोर आला आहे.

दोन दिवसांपूर्वी पाळधी येथे पालकमंत्री गुलाबराव पाटील यांच्या निवासस्थानासमोर भाजयुमोच्या कार्यकर्त्यांनी मध्यरात्री विद्यापीठ कायदा सुधारणा विधेयकाचा निषेध म्हणून रांगोळी काढून घोषणाबाजी केली होती. युवासेना व शिवसेनेने त्याविरोधात पोलिसांत तक्रार दिली असून त्यामुळे सेना व भाजपतील वातावरण तापले आहे.

आता खासदारांबद्दल मजकूर

अशातच जळगाव शहरात अज्ञात व्यक्तींनी आमदार सुरेश ऊर्फ राजूमामा भोळे यांच्या रिंगरोड येथील घराबाहेर व .क्रीडा संकुलासमोरील कार्यालयाबाहेर भाजपचे जळगाव लोकसभा मतदारसंघाचे खासदार उन्मेश पाटील यांच्याबद्दल आक्षेपार्ह मजकूर लिहून ठेवल्याने तणाव निर्माण झाला आहे.

भाजपची कारवाईची मागणी

भाजपने या प्रकाराचा निषेध केला आहे. रात्री बाराला टाटा हॅरिअर या चारचाकी वाहनातून येऊन चार अज्ञात महिला व चार पुरुषांनी या ठिकाणी गलिच्छ आणि शिवराळ भाषेत रांगोळीने लिखाण केले आहे. लिखाणातून खासदार उन्मेश पाटील व आमदार भोळे यांच्या प्रतिमेला धक्का पोहोचला आहे. अशा अज्ञात समाजकटंकांविरुद्ध गंभीर कारवाई करून सखोल चौकशी करावी अशी मागणी भाजपचे महानगर जिल्हाध्यक्ष दीपक सूर्यवंशी यांनी जिल्हा पोलिस अधीक्षक यांच्याकडे केली आहे. या प्रकरणी त्वरित कारवाई झाली नाही तर, कार्यकर्त्यांच्या भावनेचा उद्रेक झाल्यास त्याला संपूर्णपणे प्रशासन जबाबदार राहील, असा इशाराही निवेदनाद्वारे दिला आहे.