महाड : दापोली येथून पुण्याकडे जाणा-या एसटी बसला महाड तालुक्यातील रेवतळे घाटात टोकवाडी येथे झालेल्या अपघातात बसमधील सतरा प्रवासी जखमी झाले.चालकाचा बसवरील ताबा सुटल्याने हा अपघात झाला अपघातातील बस एका झाडाला टेकल्याने पुढील अनर्थ टळला. आज सकाळी सव्वा दहा वाजता ही घटना घडली .

दापोली मुरुड येथून सकाळी नऊ वाजता पुणे पिंपरी चिचवड येथे जाण्यासाठी निघालेली ही एसटी बस सव्वा दहाच्या सुमारास महाड जवळील रेवतळे घाटात घाट उतरत असतांना एका वळणावर चालक प्रभाकर गायकवाड याचा ताबा सुटल्याने रस्त्याकडेला पलटी झाली.

बस पलटी होताच आतील प्रवाशांच्या डोक्याला मार बसल्याने ते जखमी झाले. रेवतळे मोहल्ला ग्रामस्थांनी तातडीने मदतकार्य करुन प्रवाशांना बाहेर काढले. एसटी अधिकारी व रुग्णवाहिका त्वरित येथे रवाना झाल्या. या अपघातात अक्षय कासारे (दाभट), प्रभाकर गायकवाड (पुणे), उर्मिला बटावले (मुरुड), शिल्पा केळकर व शरद केळकर (पुणे), हेमलता मोरे (दापोली), सुनंदा तांबट व मंगेश तांबट (दाभोळ), अंजुम सय्य्द (दापोली), अशोक पवार (सोंडेघर), चांदबीबी खान (महाबळेश्वर), फौजिया कोंडेकर (शिरवली), अशोक येरवणकर (दापोली), मिना कुसगावकर व चंद्रकांत कुसगावकर (दाभोळ ), राधिका बेणेरे मुरुड व नारायण पवार (दापोली) हे जखमी झाले आहेत. जखमींना महाडच्या ग्रामीण रुग्णालयात दाखल करण्यात आले.

डॉ. भास्कर जगताप व पथकाने यांनी त्यांच्यावर उपचार केले. जखमींमध्ये नऊ जेष्ठ नागरिक आहेत. एसटीकडून जखमींना मदत करण्यात आली आहे. अपघातग्रस्त बस एका झाडाला टेकली नसती तर पन्नास फूट खोल कोसळून मोठी दुर्घटना झाली असती.