साटेली भेडशी (सिंधुदुर्ग) - दोडामार्ग तालुक्‍यातील वर्षा पर्यटनासाठी प्रसिद्ध असलेला मांगेली येथील धबधबा मॉन्सूनने दमदार हजेरी लावल्याने प्रवाहित झाला. त्यामुळे वर्षा पर्यटनाच्या प्रतीक्षेत असलेल्या पर्यटकांमध्ये समाधानाची बाब असली तरी या वर्षी कोरोनाचा धोका असल्याने गावकरी पर्यटकांवर बंदी घालण्याची शक्‍यता आहे. 

मांगेली धबधबा देशी विदेशी पर्यटकांचे आकर्षण आहे. गोवा महाराष्ट्र आणि कर्नाटक येथील पर्यटक दरवर्षी मोठ्या संख्येने मांगेलीत येतात. उंच आणि थंड हवेचे ठिकाण, संपूर्ण परिसरावर दिवसभर दाट धुक्‍याची दुलई, अंगाखांद्याला स्पर्शून जाणारा गार वारा आणि रिमझिम पाऊस याचे पर्यटकांना मोठे आकर्षण असल्याने विकेंडला तेथे खूप गर्दी असते. शिवाय मांगेली धबधबा जसा वर्षा पर्यटनासाठी प्रसिद्ध आहे तसाच धबधब्याचा परिसर ट्रेकिंगसाठी सर्वोत्कृष्ट आहे. त्यामुळे पर्यटकांना धबधबा कधी सुरू होतो याची प्रतीक्षा होती. अखेर कालपासून धबधबा सुरू झाला आहे; पण तेथे पर्यटकांना प्रवेश मिळण्याची शक्‍यता मात्र कोरोनामुळे धूसर आहे.