रत्नागिरी : झुक - झुक, झुक - झुक आगीन गाडी..... धुरांच्या रेषा हवेत काढी....... हे गाणं आजच्या आधुनिकीकरणात लुप्त होणार असच चित्र आहे. कोकण रेल मार्गांवर धावणाऱ्या गाड्यांना जोडलेले डिझेल इंजिन लवकरच कालबाह्य होणार आहे. रोहा ते वेर्णा अशा या मार्गाचे विद्युतीकरण करण्याचे काम युद्धपातळीवर सुरु आहे. रत्नागिरी ते रोहा या मार्गावरील बहुतांशी काम आटोपले असून गाडी चालवण्यासाठी आवश्यक्य त्या चाचण्या करण्यास सुरुवात झाली आहे. 

डिझेल इंजिन चालवताना त्यातून बाहेर पडणारा धूर आणि त्यातून होणारे पर्यावरण प्रदूषण याला पर्याय काढला जात आहे. तो म्हणजे विद्युतीकरणाचा होय. गेले चार दिवस रत्नागिरी ते रोहा मार्गांवर विजेवरील इंजिन चालवून चाचणी घेण्यात येणार असल्याची वार्ता येत होती. सगळ्यांनाच उत्सुकता होती. मुंबई मध्ये अशा गाड्या सर्वांनीच पाहिल्यात. पण दऱ्या खोऱ्यातून जाणारा कोकण रेल्वे मार्गाचे विद्युतीकरण हे एक आव्हान होते. ते पूर्ण करण्यासाठी कोकण रेल्वे प्रशासन सरसावले. 

हेही वाचा - कचरा निर्मुलनासाठी चक्क प्लास्टिक बॅंक, रत्नागिरी पालिकेचा फंडा -

डिसेंबर 2018 रत्नागिरी तुन विद्युतीकरणाचे काम सुरु झाले. दोन वर्षात ते पूर्ण करण्यात यश आले. गुरुवारच्या मुहूर्तावर पहिले विजेवरील इंजिन या मार्गांवर धावले. रोहा येथून या इंजिनचा प्रवास सुरु झाला. पूल आणि नियमित रुळावरून व्यवस्थितपणे नियमित वेगाने ही गाडी धावली. ना धूर, ना गाडीचा आवाज असा प्रवास गुरुवारी या विजेवरील इंजिनचा झाला.

आता प्रतीक्षा आहे, ती रेल्वे गाडी धावण्याची. इंजिनची चाचणी अपेक्षेपेक्षा यशस्वी झाल्यामुळे सर्वांनी निःश्वास सोडला. इंजिनवरील लोकोमधेच बंद पडला किंवा कोणती समस्या निर्माण झाली तर नियमित वाहतुकीचा खोळंबा होऊ नये यासाठी डिझेल इंजिन ही त्या मागे जोडले होते. पण डिझेल इंजिन चालवण्याची वेळ लोको पायलटवर आलीच नाही. पुढील दोन महिन्यात कदाचित सर्वच गाड्या विजेवर चालतील. 

संपादन - स्नेहल कदम