गुहागर: आमच्या कंपनीत कुरिअर करण्यासाठी नोंदणी करावी लागते. आम्ही पाठवतो त्या लिंकवर नोंदणी करा. सुरुवातीला फक्त दोन रुपये पाठवा आणि ओटीपी आला तर सांगा, असे सांगून घोळात घेतले. अनेकदा व्यवहार करणाऱ्या या व्यक्तीनेही अनाहूतपणे ओटीपी सांगितला आणि अवघ्या १० मिनिटांत बँक खात्यातून ९३ हजार ९९९ एवढी रक्कम लुटली गेली.

हा प्रकार शनिवारी (ता. ९) हेदवतड येथे घडला. गुहागर तालुक्यातील इलेक्ट्रॉनिक मीडियाशी संबंधित केसरी विश्वनाथ नागवेकर (वय ४३) यांनी याबाबतची तक्रार गुहागर पोलिस ठाण्यात केली आहे. या तक्रारीनुसार, हेदवतड येथे आलेल्या केसरी नागवेकर यांच्या पत्नीला पुण्याला तातडीने कुरिअर पाठवायचे होते. म्हणून त्यांनी गुगल सर्चवर कुरिअर कंपनी शोधली. त्या कंपनीच्या माहितीत एक मोबाईल क्रमांक सापडला. त्या मोबाईलवर त्यांनी फोन केला; मात्र हा फोन कोणीही उचलला नाही.

पाच मिनिटांच्या अवधीत नागवेकर यांना अन्य मोबाईलवरून फोन आला. तुम्ही कुरिअरची चौकशी करत आहात ना? आमचा तो फोन बंद आहे, असे सांगून मोबाईलवर बोलणाऱ्या अज्ञात व्यक्तीने तुम्हाला कुरिअर करायचे असेल, तर तुम्हाला प्रथम नोंदणी करावी लागेल. तुमच्या मोबाईलवर मी लिंक पाठवत आहे. त्याद्वारे तुम्ही नोंदणी करा. तसेच देवघेवीचा व्यवहार पडताळण्यासाठी फक्त २ रु. पाठवा, असे सांगितले.

सौ. नागवेकर यांनी आपल्या पतीला ही सर्व गोष्टी सांगितली. लगेच नागवेकर यांनी लिंक उघडली. नोंदणीचा फॉर्म भरत असताना पुन्हा अज्ञात व्यक्तीचा चौकशीसाठी फोन आला. त्याने गप्पांच्या ओघात २ रुपये पाठविण्यासाठी बँकेतून आलेला ओटीपी विचारला. नागवेकर यांनी अनाहूतपणे ओटीपी दिला. त्यानंतर थोड्या वेळाने नागवेकर यांच्या बँक खात्यातून ४९ हजार ९९९ रुपये काढले गेल्याचा संदेश आला. त्यावेळी नागवेकर यांना आपण केलेली चूक आठवली. इतक्यात पुन्हा ४४ हजार काढल्याचा संदेश आला. एकूण ९३ हजार ९९९ रुपये नागवेकर यांच्या खात्यातून काढण्यात आले. केसरी नागवेकर यांनी याबाबत गुहागर पोलिस ठाण्यात तक्रार दाखल केली. त्यावरून अनोळखीविरोधात गुन्हा दाखल करण्यात आला असून, अधिक तपास पोलिस करत आहेत.