कुडाळ - ‘वंदे मातरम्’, ‘भारत माता की जय’, ‘जय जवान जय किसान’ अशा घोषणा, लेझीम पथकाची सलामी, एनसीसी कॅडेटच्या विद्यार्थ्यांचा वेशभूषेत सहभाग, डौलाने फडकणारा भारताचा तिरंगा, विविध प्रकारची स्वातंत्र्य गीते अशा आगळ्यावेगळ्या वातावरणात काढलेल्या रॅलीने १९७१ च्या भारत-पाक युद्धामध्ये महापराक्रम गाजविलेल्या टी-५५ रणगाड्याचे कुडाळ येथे शनिवारी स्वागत करण्यात आले.

हा रणगाडा एमआयडीसीतील सी.बी.एस.ई. बोर्डाच्या बॅ. नाथ पै सेंट्रल स्कूलमध्ये  ठेवण्यात येणार आहे. या रणगाड्याच्या माध्यमातून या ठिकाणी भारतीय सेनेच्या महापराक्रमाचा इतिहास उलगडण्यात येणार आहे. केंद्र सरकार आणि बॅ. नाथ पै शिक्षण संस्था सिंधुदुर्ग यांच्या सहकार्याने हा रणगाडा कुडाळात दाखल झाला आहे.

येथील बॅ. नाथ पै शिक्षण संस्थेने विद्यार्थ्यांना भारतीय सेनेने गाजविलेल्या महापराक्रमाची माहिती व्हावी, त्यांना भारतीय सैन्याच्या शस्त्र सामग्रीचे ज्ञान मिळावे, यासाठी भारतीय थल सेनेकडे टी-५५ या रणगाड्याची मागणी केली होती. भारतीय थलसेनेकडून (आर्मी) बॅ. नाथ पै शिक्षण संस्थेचा प्रस्ताव मंजूर झाला.

हा रणगाडा १९७१ च्या भारत-पाक युद्धात महापराक्रम गाजविलेल्या रणगाड्यांपैकी एक आहे. शुक्रवारी (ता. १९) आर्मी विभागाच्या खडकी- पुणे येथून तो ताब्यात घेण्यात आला.