सिंधुदुर्गनगरी -  राज्य शासनाने नववी ते बारावी पर्यंतच्या माध्यमिक शाळा सुरू करण्याचा निर्णय घेतला असला तरी सिंधुदुर्गात अद्यापही विद्यार्थ्यांचा शंभर टक्के प्रतिसाद लाभलेला नाही. जिल्ह्यातील 247 शाळांमधील 42,424 विद्यार्थ्यांपैकी केवळ 10,033 विद्यार्थीच उपस्थित राहात असल्याच्या अहवालावरून अद्यापही तब्बल 32,391 विद्यार्थी शाळांपासून दूर असल्याचे चित्र स्पष्ट झाले आहे. 

शासन निर्णयानुसार जिल्ह्यात 23 नोव्हेंबरपासून नववी ते बारावी पर्यंतच्या माध्यमिक शाळा सुरू झाल्या असल्या तरी अद्यापही विद्यार्थ्यांचा 100 टक्के प्रतिसाद दिसून येत नाही. जिल्ह्यात 247 माध्यमिक विद्यालय असून त्यामध्ये 42 हजार 424 विद्यार्थी आहेत. शाळा सुरू करण्याच्या निर्णयानंतर पंधरा दिवस उलटले तरी अद्यापही शंभर टक्के शाळा सुरू झालेल्या नाहीत. 247 शाळांपैकी 188 एवढ्याच शाळा सुरू करण्यात प्रशासनाला यश आले आहे; मात्र विद्यार्थ्यांची उपस्थिती पाहता 42 हजार 424 विद्यार्थ्यांपैकी केवळ 10 हजार 033 विद्यार्थीच उपस्थित राहत आहेत. उर्वरित 32 हजार 391 विद्यार्थी अद्यापही शाळेच्या प्रवाहापासून दूर आहेत, असे अहवालावरून स्पष्ट झाले आहे. 

तालुकानिहाय शाळांमधील उपस्थिती 

तालुका       शाळा       एकुण विद्यार्थी       उपस्थिती 
दोडामार्ग       17          1556                   509 
वैभववाडी      20          2102                    935 
कुडाळ          34          8476                    1505 
देवगड          37          6065                      1217 
वेंगुर्ले           19          3464                        744 
मालवण        35          4376                    815 
सावंतवाडी      50         8415                      3063 
कणकवली      35         7970                     1245  

संपादन - राहुल पाटील