महाड : पैशाचे आमिष दाखवून महाड शहारातील एका अल्पवयीन मुलीला विविध ठिकाणी नेऊन तिच्यावर लैंगिक अत्याचार केल्याप्रकरणी महाडमधील सहा जणांना अटक करण्यात आली आहे. तर एक आरोपी मात्र फरार झाला आहे. यामध्ये एका महिलेचा समावेश असून ती या प्रकरणातील सूत्रधार असल्याची माहिती पीडित मुलीने पोलिसांना दिली. या धक्कादायक प्रकाराने महाड शहर चांगलेच हादरले. 

महाडमधील काकरतळे भागातील एका 17 वर्षीय मुलीला करंजखोल गावातील स्वाती धुमाळने पैशाचे आमिष दाखवत तिला वेश्या व्यवसाय करण्यास भाग पाडले. सप्टेंबर 2017 ते 12 आक्टोबर 2018 या कालावधीत या अल्पवयीन मुलीवर महाडमधील सहा जणांनी तिला विविध ठिकाणी नेऊन तिच्याबरोबर जबरदस्तीने शारीरीक संबध ठेवले. याबाबत महाड शहर पोलिस ठाण्यात तिने स्वतः तक्रार दाखल केली आहे.

अल्पवयीन मुलीला या अनैतिक संबंधास भाग पाडलेल्या स्वाती बळीराम धुमाळ (वय 35, रा.करंजखोल) व तिच्यावर अत्याचार करणारे प्रवीण यशवंत निकम वय( 53, रा.करंजखोल), श्रवण बटवरसिंग राजपूत (वय 22), अजय उर्फ अजित रामचंद्र पवार  (वय 25), उमेश मोतीराम सावरे (वय 25), रणजीत रमेश नातेकर (वय 37) सर्व राहणार महाड या सहा जणांना अटक करण्यात आली तर निलेश शिंदे हा फरार झाला. पोलिस निरीक्षक शैलेश सणस हे या प्रकरणाचा तपास करीत असून या सात जणांवर गुन्हा दाखल करण्यात आला आहे.