पाली (जि. रायगड) - शिक्षक दिनी जिल्ह्यातील बहुतांश शाळांमध्ये विद्यार्थी शिक्षकाच्या भूमिकेत होते. या मुलांनी दिवसभर आपल्या मित्र मैत्रिणींना अध्यापन केले. विद्यार्थ्यांसाठी हा अनुभव अतिशय रंजक आणि जबाबदारीचा होता.

जिल्ह्यातील बहुतांश राजिप शाळेत देखील हा उपक्रम राबविला गेला. यावेळी शिक्षकांनी शिक्षक दिनाचे महत्व सांगितले. विद्यार्थी छानपैकी वेशभूषा करून आले होते. शिक्षकांच्या भूमिकेत जाण्यासाठी त्यांनी आधी पूर्वतयारी केली होती. त्यांच्या शिक्षकांनी आदल्या दिवशी शिक्षक होणाऱ्या विद्यार्थ्यांची उत्तम तयारी करून घेतली होती. नियोजनानुसार विद्यार्थांनी शिक्षकांच्या भूमिका करुन मुलांना शिकवले व शिकवून झाल्यावर आपापले अनुभव व्यक्त केले. विदयार्थी खुप आनंदीत होते. काही शाळांत विदयार्थांनी स्वतः तयार केलेली भेटकार्ड गुरुजनांना देऊन शुभेच्छा दिल्या. 
        
या प्रकारच्या उपक्रमांमुळे विद्यार्थ्यांना शिक्षकांबद्दल कृतज्ञता व्यक्त करता येतात. त्यांना आपल्या जबाबदारीची व कर्तव्यांची जाणीव होते. तसेच त्यांचा आत्मविश्वास वाढतो. - दिलीप गावीत, मुख्याध्यापक, रा. जि. प. डिजिटल शाळा धोडसे