वृद्ध कलाकार मानधन प्रस्ताव रखडले

१ हजार २८ लाभार्थी; समिती गठित न झाल्याने प्रतीक्षा

सकाळ वृत्तसेवा
सिंधुदुर्गनगरी, ता ५ ः वृद्ध कलाकार मानधन योजनेचे लाभार्थी निवड करणारी समिती अद्याप गठित न झाल्याने कलाकारांचे प्रस्ताव मंजुरीसाठी रखडले आहेत. जिल्ह्यात शासनाच्या वृद्ध कलाकार मानधन योजनेचे १ हजार २८ लाभार्थी आहेत. या वृद्ध कलाकारांना जून २०२३ पर्यंत प्रतिमहा २ हजार २५० रुपयेप्रमाणे एप्रिलपासून तीन महिन्यात त्यांच्या बॅंक खात्यात प्रत्येकी ६ हजार ७५० रुपये मानधन जमा केले आहेत. जून महिन्याचे १०२८ लाभार्थ्यांना २३ लाख १३ हजार रुपये एवढे मानधन वितरित केले असून एप्रिल ते जूनपर्यंत गेल्या तीन महिन्यांत एकूण ६९ लाख ३९ हजार रुपये एवढ्या मानधनाचा लाभ दिला आहे.
जिल्ह्यात वृद्ध कलाकारांची संख्या मोठी आहे. यामध्ये भजन, कीर्तन, दशावतार यांसारख्या विविध कलाक्षेत्रांत नावलौकिक मिळविलेल्या वृद्ध कलाकारांचा समावेश आहे. वृद्ध कलाकारांना मानधन देण्याची योजना शासनाकडून राबविली जात असून या योजनेंतर्गत सद्यस्थितीत जिल्ह्यातील १०२८ वृद्ध कलाकारांना लाभ मिळत आहे. शासनाकडून वृद्ध कलाकारांच्या बँक खात्यावर दरमहा २ हजार २५० रुपये एवढे मानधन जमा केले जाते. त्यानुसार जूनपर्यंतचे मानधन त्यांच्या बँक खात्यात जमा केले आहे, अशी माहिती समाज कल्याण विभागाने दिली.
वृद्ध कलाकार मानधन योजनेसाठी जिल्ह्यातील वृद्ध कलाकारांचे प्रस्ताव प्राप्त झाल्यानंतर जिल्हास्तरीय वृद्ध कलाकार मानधन निवड समितीसमोर हे प्रस्ताव ठेवले जातात. प्राप्त प्रस्तावांतून पात्र १०० वृद्ध कलाकारांचे प्रस्ताव मंजूर करून शासनाच्या मान्यतेसाठी पाठविले जातात. शासन मान्यतेनंतर या योजनेचा लाभ दिला जातो; मात्र विद्यमान निवड समितीची मुदत संपल्यानंतर नव्याने ही समिती अद्याप गठित झाली नाही. त्यामुळे प्राप्त प्रस्ताव मंजुरीच्या प्रतीक्षेत आहेत. जिल्ह्यात वृद्ध कलाकारांची संख्या मोठी आहे; परंतु दरवर्षी मर्यादित १०० प्रस्ताव मंजूर होत असल्याने अनेक कलाकार या योजनेच्या लाभापासून दूर आहेत. तर काही कलाकारांचे निधनही झाले. सद्यस्थितीत जिल्ह्यातील १०२८ वृद्ध कलाकार या योजनेचे लाभार्थी आहेत. यामध्ये वेंगुर्ले १४५, वैभववाडी ५५, सावंतवाडी ११४, मालवण १६०, कुडाळ १६५, कणकवली २५८, दोडामार्ग ५१, तर देवगड तालुक्यात ८० वृद्ध कलाकार या योजनेचे लाभार्थी आहेत, अशी माहिती जिल्हा परिषद समाज कल्याण विभागाकडून देण्यात आली.
..............
कोट
कलाकारांना मानधन योजनेचा लाभ मिळावा, यासाठी प्रस्तावांतून पात्र लाभार्थींची निवड करण्याचे अधिकार जिल्हास्तरीय मानधन निवड समितीला आहेत; मात्र अद्याप समिती गठित झाली नाही. निवड समिती गठित झाल्यानंतर ही समिती प्राप्त प्रस्तावांतून १०० कलाकारांची निवड करणार आहे.
- विनायक ठाकूर, समाज कल्याण अधिकारी