68681
देवगड ः केळकर महाविद्यालयात विद्यार्थी गौरव करण्यात आला.

स्पर्धा परीक्षा, उद्योजकतेचे
देवगड महाविद्यालयात धडे

सकाळ वृत्तसेवा
देवगड, ता. ३ ः येथील स. ह. केळकर महाविद्यालयातील महिला विकास कक्ष व जिल्हा कौशल्य विकास स्वयंरोजगार आणि उद्योजकता मार्गदर्शन केंद्र सिंधुदुर्ग यांच्या संयुक्त विद्यमाने महाविद्यालयात ‘स्त्री-पुरुष समानता, बेटी बचाओ-बेटी पढाओ’ अभियान अंतर्गत कार्यशाळेचे आयोजन केले होते. यामध्ये मान्यवरांनी मार्गदर्शन केले.
या कार्यशाळेसाठी जिल्हा कौशल्य विकास रोजगार व उद्योजकता मार्गदर्शन केंद्राचे गणेश चिमणकर, अण्णासाहेब पाटील आर्थिक मागास विकास महामंडळाचे जिल्हा समन्वयक गोविंद परब मार्गदर्शक होते. कार्यशाळेच्या पहिल्या सत्रात चिमणकर यांनी विद्यार्थ्यांना स्पर्धा परीक्षा व उद्योजकता यामध्ये करिअर निर्माण करण्यासाठी आवश्यक मार्गदर्शन करून शासनाच्या विविध योजनांमधून विद्यार्थ्यांना होणारी मदत याबाबत माहिती दिली. कार्यशाळेच्या द्वितीय सत्रात परब यांनी विद्यार्थ्यांना उद्योजकतेसाठी विविध मार्गदर्शनाचा मार्ग, विविध योजनांच्या माध्यमातून होणारे अर्थसहाय्य व स्वयंरोजगार याबाबत मार्गदर्शन केले. यावेळी महाराष्ट्र राज्य इनोव्हेशन सोसायटी, कौशल्य विकास, रोजगार, उद्योजकता आणि नवोपक्रम विभागाच्या वतीने घेतलेल्या ‘महाराष्ट्र स्टुडंट्स इनोव्हेशन चॅलेंज २०२३’ स्पर्धेचा जिल्हास्तरावरील निकाल घोषित करण्यात आला. यात प्राची कदम हिने यश प्राप्त करून एक लाखाचे बक्षीस मिळविले होते. तिच्या या यशाचेही या कार्यक्रमाच्या निमित्ताने कौतुक करून सत्कार करण्यात आला. महिला विकास कक्ष समन्वयक सुखदा जांभळे यांनी प्रास्ताविक केले.